مذكرات بنت العليا

دخلت المدرسة بسرعة مثل عادتي لكن مظهري كان غير عادي من طالبة و ربما معلمة، فالكعب العالي و المكياج السميك و الشعر الذي تغطيه الرولات و حقيبتي المدرسية ما فيها الكتب لكن ملابس ثانية و مكياج و عطر و أوتجراف و المصيبة العظمي جهاز جوال..
كل هذا غير عادي، لكنه يوم غير عادي،
اليوم بأطلق المدرسة والطابور الصباحي و المريول و تفتيش على الأسلحة البيولوجية، أحم أقصد (الأظافر الطويلة)
و أتخلص من وجه المديرة الشريرة وإستاذة النشاط السخيفة، و كراسي المعمل العالية التي يمنعونا عن الدوران بها..

توقفت أمام البرادة لأفسخ عباءتي أمام عيون البنات الغيورة، و رحت للساحة الداخلية و أنا أمسك نفسي علشان ما أصرخ
" أخيرا بأتخرج ياناس"

وفي الساحة الداخلية لقيت زميلاتي يجهزونها للحفلة مع خادماتهم شعرت بأسف "ليش ما جبت خدامتنا معي؟!"
صلحت طرحتي فوق رأسي حتى ما تطلع للرولات.
وتفرجت على الساحة إلي صارت عالم ثاني
مسرح و بوفية و كراسي حمراء، كانت في عيوني أجمل من مسارح برادوي، فهنا بعد حوالي الساعة بأقطع الممر لأحصل على
((شهادة إفراج))
من سجن المدرسة الكيئب الذي لم يعتقني إلا بعد بلوغ الثالثة و العشرين..

و بعد لحظات جاء الفرج و سمح لنا بالصعود للفصول دون ما نوقف في الطابور الصباحي، و تغيير مرايلنا الرصاصية إلى تنورة سوداء و قميص أبيض والأهم
(((عباءة التخرج)))

فرحت إلى غرفة المعلمات حتى يكتب الي أحبهم لي في الأتجراف ، لما شافوني قالوا لي
" صرتي عروس"

طوال عمري أطير من الفرح لأي كلمة حلوة من أساتذتي المفضلات فما بالك بكلمة صرتي عروس؟
و أنا رفضت الكثير
علشان أخلص دراستي الثانوية و بعد أيام أصبر أقدر أتزوج،
متى يارب يجئ فارس أحلامي؟!

تركت الأوتجراف معهم و رحت لفصلي للمرة الأخيرة.. و لقيت فصول ثالث ثانوي العلمي و الأدبي.. صارت صالونات تجميل
و صوت الأستشوار أعلى من صوت الطالبات الي يطلبون شدو أو مرآية.. بدل إدوات هندسة أو آله حاسبة.
كنت حطيت الأساس في البيت علشان كذا كملت مكياجي و فكيت الرول عن شعري ،و ساعدت صديقاتي سوزان و الجوهرة في وضع الشدو ومكياج العيون،

رحنا إلى دورات المياة-أكرمكم الله- و بعد أن لبست ملابسي سمعت صوت الجوال في مريولي المعلق على الباب،
خطفته بسرعة.. و ركضت إلى بوابة المدرسة دون أن أهتم بإلي يمكن أن يصير لكعب حذائي العالي، أو ما يمكن أن تسويه فيّ مديرة المدرسة لما تشوف جوالي،

كانت جدتي عندها روماتيزم جايه لحضور الحفلة، فبغيت أوصل بسرعة لمساعدتها على الدخلة، لأن أمي على أخر لحظة رفضت الحضور، فهي ما تحب حريم العليا
الأنيقات، إلا أني لما وصلت الباب ما لقيت أحد.. فأتصلت على أخوي خالد فقال لي بأنه وصلها للباب و أنها داخل المدرسة الآن.

ركضت في أنحاء المدرسة كالمجنونة أدور عليها، لقيتها في الساحة الداخلية، هي من شافتني أول، و ما عرفت ألا

CENTER]قلت في نفسي:" مثل العادة؟! كل عيال الناس أحسن منا، حتى لو كانوا كفار!هذه جزايي التي أركض أدور عليها و تاركة ملابسي في الحمام!يالله الحمد لله أنها دخلت المدرسة و استقرت

عندي عائلة أحسد عليها ((((تعلب النكد و توزعه و تصدره))) مجاناً
و هو المنتج الوحيد الذي لا تؤثر عليه مؤشرات السوق
و لا التضخم و لا حتى سقوط الأسهم،
دائماً _ما شاء الله علينا_ لدينا كل لحظة نكد و في أي مكان نمر فيه لا بد أن نترك بصمانتا النكدة!
و بعون الله و توجيهات أصحاب الشأن ( أفراد عائلتي الأعزاء)قادرين على سد حاجة البلد و التصديرلكل سكان العالم !
و هو منتتج مجاني ومتوفر بكثرة!
و لا يخاف عليه من النفاذ مثل البترول و لا من الجفاف كا المزروعات و لا يقدر عليه لا حمى الوادي السعيد و لا جنون الفرح!
.........................

منذ سنين كنت صديقة لها و لأخواتها الروح بالروح، خاصة أختها الكبرى مزنة، لكن الأيام صدمتني فيهن، و ندمت على صداقة سنين، أسوء شيء عندما يخلى عنك صديقك في وقت
الحاجة خاصة إذا كان هو الذي تسبب فيها، لكن الحمد لله الي أظهرهم على حقيقتهن.

مرت الساعة مملة للبعض و قصيرة للواتي ما حسو بأن شكلهم تمام و top رغم شغل الكوافيرات طول ليلة أمس، كانت أغلب البنات متحمسات وحريصات أن يكونو ملكات جمال،
فهذه فرصتهم ليطلعو قدام زميلاتهم قد أيش هم أنيقات و حلوات و بنات عز،
لكن بعضهم كان عندهم هدف ثاني يدورونه
كانو يبون الفوز بالجائزة الكبرى
(عريس غني و ابن ناس),
فهي هذه الساعة كانت حريم العليا كلهم متجتمعين في الساحة، و البنت الفاهمة لابد أن تعرف كيف تخطف عريس لقطة، و لا تسمع كلام الناس
"صيري على طبيعتك"
هذا ينفع لو كنت تبين شحاذ خريج سجون،

أما عيال العوائل الراقية فهم يحتاجون للخطط و استراتيجيات دقيقة، و أول خطوة كوني ملكة الحفلة، و الباقي على الله.
بصراحة كنت أريد الهدفين لكذا خططت لستايلي مثل ما يخطط طلاب ستار أكاديمي لطلتهم، أو ممثلات السينما في حفلات الأوسكار و مهرجان كان،،
أمس رحت إلى (Fortune) الموجود في هارفي نيكرز
و قمت ب ( re look) كامل، قصيت شعري و صبغته و وضعت الرول عليه..
و دخلت ال( spa ) و ما تركت شيء.. أخذت خدمة كاملة
قناع لشعري،
و حمام مغربي،
و قناع طحالب للجسم كله،
و تنظيف بشرة،
و بديكير و منيكير،
و تدليك سويدي،
و تشقير حواجب،
و واكس
ولا كأني عروس لكني اشتهيت أدلع نفسي بعد تعب سنة..و أطلع بأحلى طلة قدام البنات و الناس

و اخترت ملابسي بعناية فائقة، ما كانت بس تنورة سوداء و بلوزة بيضاء و لكن أخترت تصيمم يبرز جمال جسمي ، و يجعلني ملكة الحفلة،


و بالنسبة لي لم تكن هذه الساعة بالمملة كثيراً،، و كانت كافية جداً،،
حطيت اللمسات الأخيرة على ستايلي بلبس طوق الورد الجوري فوق رأسي بدلاً عن قبعة التخرج الممنوعة من إدارة الأشراف التربوي، و رتبت شعري ليظهر طوله و كثافته و نعومته، و ما لبست عدسات ملونة مثل زميلاتي لأن عيوني بنية بس لبست عدساتي الطبية الشفافة، و أخر خطوة لبست عباية التخرج، و طلعت أخذ أوتجرافي،

دايم كان يدهشني بأن معلمات مدرستنا لما يتكلمون عن بعض يستخدمون الألقاب قدامنا أما ورانا فباسمائهم الأولى،
ما أدري الموضوع له علاقة بسمعة مدرستنا عند إدارة الأشراف و المدارس الأخرى بأنها ((مدرسة العوائل)) ولا كل المدارس نفس الموضوع؟
أم لأن مدرستنا مشهورة بعد بأنظمتها المتشددة، يمكن هذا السبب الذي خلى الكثير من العوائل الثرية و الراقية تحط بناتها فيها رغم أنها مدرسة حكومية،
و المعلمات المميزات و ذوات الواسطات يفضلون يشتغلون فيها، لسمعة بناتها و الإنضباط الشديد فيها،
لهذا ما صدق الناس بأنهم سمحوا بحفلة التخرج، وإلي أعرف بأنه بيصير فيها، لكن إستاذة النشاط تنافق المديرة الجديدة، فعندها الضوء الأخضر تسوي الي تحب.

أخذت الأوتجراف بعد أن شكرتهم، و رجعت لصديقاتي أوريهم وش كتبو لي،

لكن ما قلته لأنها راسبة في الفصل الأول بالأنجليزي، و تمن علينا _نحن المتفوقات_ بأنها بتدخل الجامعة بفلوسها!!
تركتها و ذهبت لصديقاتي ليكتبو لي، و كل بنت أرتاح لها.. تعطيني أوتجرافها لأكتب لها.. كنت أطلب منها تكتب لي..

و مر الوقت بسرعة حتى جت إستاذة النشاط و طلبت منا ننزل و ننظم المسيرة في معمل الحاسب الآلي،
و هناك وقفنا في طوابير لأخر مرة، لكن هذه المرة كانت بالترتيب الأبجدي العكسي لاسماءنا فكانت أول بنتين يمنى و وجدان و الأخيرات أروى و الجوهرة،
و كان بنات العلمي و بعدهم بنات الأدبي،،
ثم دخلنا الساحة الداخلية وسط الدخان على صوت شاعر يمدح في مدرستا ، و عندما أكتملنا وقفت كل طالبة قبال زميليتها، و بدء تكريم الخريجات فكل واحدة حسب الترتيب الأبجدي كان الشاعر يقول اسمها و يمدح فيها بيتين شعر ، تمر بين طابور زميلاتها تروح المنصة و تسلم على مديرة المدرسة التي تعطيها ***شهادة تقدير**** ثم تجلس على الكراسي الخلفية

كنت أبغى أكون بين صديقاتي أو على الأقل بين زميلات أرتاح معهم، لكن لأن الترتيب كان أبجدي صرت بين حصة و زينة،
و كل وحدة فيهم كانت تحاول التقرب مني لكني أكرهم لتصرفاتهم و طبايعهم، و لأني عارفة بأنهم يتكلمون عني عند البنات،

حسيت بعيون الحاضرت تنطق بالأعجاب عندما جاء اسمي
فأنا ظهرت بعد حصة التي تملك حصة من القبح تعادل قبح أخلاقها!
و ارتحت أكثر لما تذكرت بأن زينة بعد اسم على غير مسمى!

لكني نسيت التعاليم الصارمة لأمي و كل الأمهات
" أركدي"
" الرزانة زينة"
" خلي عنك العجلة و الخفافة و أمشي حبة حبة"
فمشيت بسرعتي العادية و ما عرفت كيف أمشي بثقل، سلمت على المديرة و عطيتها نظرة كراهية على مواقفها معي إذا تأخرت دقيقة عن الطابور،
و أخذت منها شهادتي و هديتي( صندوق زجاجي فيه بورش عليه اسم المدرسة و تاريخ التخرج)
ثم ناظرت جدتي بسعادة، و رحت لأجلس مع صاحبتي الجوهرة.
كل هذا قبل أن ينتهى البيتن!

و استمرت الفعاليات

 كلمة المديرة (جعلتني أدعي على الذي توسط لها لتصيرمديرة علينا،، و أدعي ربي تنقل للدخل المحدود أو النسيم كي تنتقم لنا منها بناتهم!)
 كلمة المعلمات ( ألقتها إستاذة الإنجليزي مدحت فينا و قالت: أننا أحسن دفعة مرت عليها ثم قالت:
(I weal mice yow)

فصرخت وسط المسرح) (me too...me too
 كلمة الخريجات ( التي كنت أتمنى إلقيها لكن طبعاً صارت لطالبة المفضلة لدى إستاذة النشاط،
و قلت في نفسي عندما سمعت التفاهة التي تقولها "صدق من قال عنها مدرسة الواسطات"!)
 أنشودة التخرج( غبية بشكل لا يمكن وصفه، خلتني أحس بأني طالبة روضة!)
 مسرحية سخيفة (لم أصدق متى أنتهت!)

و أخيراً قنبلة الموسم التي بعدها:
- تم منع المدرسة من إقامة حفلات تخرج.
- وأهتزت المدرسة من صوت الصراخ و التصفيق.
- و ما يبقى أحد لم يتكلم عني بالسوء أو الخير.
- وخذت لقب أجمل مودليز.




،، وللحديث بقية ،،

الفصل الثاني: " "Game over

"وش قصة خطوبتي التي يعرفها كل الناس و أنا ما سمعت عنها شيء؟"
هذاك إلي يشغل تفكيري و أنا واقفة خلف الستارة.. أوجه زميلاتي العارضات في الخروج للعرض.. أمام الحاضرات في حفل تخرجي من الثانوية..
كنت أحاول السيطرة على أفكاري بحيث.. لا يظهر شيء أمام زميلاتي يفضح ما في داخل نفسي،
انتهى العرض على خير.. و ما يبقى غير تقطيع جاتوة التخرج

قطعتها أستاذة النشاط مع بعض الطالبات المحبوبات عندها، تزاحمنا على الجاتوة لنأخذ القطع إلي فيها أسمائنا،
ثم جلسنا نأكل في أي مكان ، أخذت نصيبي لجدتي وتقاسمناه، لم تتكلم جدتي عن إلي سويته في عرض الأزياء، الحمد لله كنت ميتة من الخوف أن تخانقني قدام الناس،
لكن يظهر بأنها ما اهتمت كثير بالي شافته خاصة و أن كثير من زميلاتي سوو مثلي و أكثر،
جت أستاذة النشاط و قالت لي: وش تسوين في ذا؟
قلت: جالسة مع جدتي.
قالت: المفروض ما تقعدين مع الأمهات روحي.
قمت و أنا ساكتة، أكره هذه الأستاذة و أظن بأنه شعور متبادل
يمكن (لأني حقانية و لا أنافقها، و ما ني من حاشيتها)،
و يمكن (لأني ما أحب التعامل معها و لا أعطيها وجه) تعاملني بها الشكل،
المهم أنه يومي الذي طالما انتظرته وما رح أسمح لها و لا لأشكالها يخربونه عليّ،
شفت الطالبات مع أمهاتهم متجمعين حول الأساتذة، سمعت الكلام الحلو الذي تقوله أستاذة الإنجليزي على كل طالبة لهذا انتظرت شوي حتى خف الزحام حوليها
•و قلت لها: معلمة.. الله يخليك.. تجين تسلمين على جدتي؟
•قالت : أيه طيب، وينها؟
مسكتني من يدي، و رحت بها لجدتي كنت أبغى أعرف وش بتتقول عني،، أكيد بيكون كلام حلو، فأنا طالبة مميزة عندها، وما ضيعت تعبها معي
و قدرت أن أتجاوز مشكلاتي في مادتها و أتفوق فيها،
وصلت إلى جدتي

•و قالت: السلام عليكم خالة.
•جدتي بدت الأسطوانة إلي ما تضايقت منها يوما غير ها اليوم: الله يوفقكم، الله يخليكم، الله يصلح عيالك، الله يسعدك، الله يحرم عليك بنات حواء...
•أنحرجت أستاذتي و ما عرفت وش تقول غير: جزاك الله خير يا خالة، و الله أنه شوي و أبكي.
•كملت جدتي: الله يعافيكم، الله يرزقكم، الله يهنيك، الله يرحم والديك...
•زاد إحراج أستاذتي و قالت: جزاك الله خير يا خالة، ما سوينا إلا الواجب.
و راحـــــــــــــــــت،، و أنا أنقهرت لأني ما سمعت وش بتقول عني.

جاتني زميلتي سديم شايلة سلة من ورود الجوري و عطتني وردة
• و قالت: هذي من جدتي لكل بنات الدفعة و مبروك التخرج.
• قلت: شكراً ، مبروك تخرجك، و شكراً على الكلام الحلو إلي كتبنيه في اوتجراف، كان ودي أكتب لك كلام زيه بس الصراحة ما كان معي وقت.
• قالت: لا عادي حبيتي، كلك ذوق، بالمناسبة ترى ما معي رقمك، بأوزع الورد و أجي أخذه.
• قلت: أنتظرك حياتي.

كلام سديم فتح علي باب التفكير في إلي خططت له

(من بأعطيها Game overمن زميلاتي؟)

فعلاقتي جيدة بأغلب الطالبات حتى إلي ما أرتاح لهم كنت أعاملهم برسمية و احترام، إلا أني لم أكن أتصل إلا على سوزان و الجوهرة،
و أعتقد بأنه حلو أني أتواصل مع بعض زميلاتي، لكن في مدرستي المجاملات و أتكيت سيد الموقف، فمن الصعب أن أعرف بالضبط من هي تحب أن تتواصل معي و من ما تبي،
لهذا قررت بأن أكون أنا البادئة، ما رح أوقف في الطرف أستنى من تطلب مني رقمي مثل سديم، خاصة و أني كنت ليدي و ذوق و رسمية مع البنات، فيمكن يستحون أنهم يسألوني و يتوقعون بأني كنت أجاملهم، لهذا وضعت خطة من فرصتين:
الفرصة الأولي: أروح لزميلتي إلي أرتاح لها و أحب أن نبقى على اتصال و أسألها معك رقمي؟>>> و أنا أعرف بأنه مو معها<<< فإذا قالت نعم معي رقمك.
حصلت على
Game ove
من المرة الأولى و خلصت نفسي من علاقة كلها مجاملات و نفاق، و إذا قالت: لا أعطيني رقمك، أعطيتها و ما خذت رقمها!
لأن الفرصة الثانية: أنتظر اتصالها عليّ حتى لو تأخر، لأني ماني متأكدة من أنها طلبت رقمي مجاملة لي، فإذا ما تتصل تحصل على
Game over
و أكون أرحت نفسي من الاتصالات على بنات لا يحبوني و يجاملوني و الله أعلم وش يقولون عني من وراي؟
لكني لم أعرف أن الأيام أضافت لي
فرصة ثالثة: و أعطتني Game over مع ناس كانوا غالين على قلبي لكن قلة التواصل جعلنا بعدين عن بعض، بحيث صار من الصعب أن نعيد ما فات.
.............................................
قرب الحفل يخلص، ناظرت هدايا الطالبات من أهاليهم و صديقاتهم إلي تقدم قدامنا،
(باقات ورود و دروع و تذكارات ثقيلة..الخ)
حسيت بشيء من الغيرة تمنيت لو أن أحد جاء إلي بهدية قدام زميلاتي أو حتى على الأقل جاء أحد مع جدتي للمدرسة، سمعت البنات يتكلمون عن بعض حفلة تخرج سديم ، لكنها ما دعتني يمكن لأنها ما خذه فكرة عني بأني متدينة و أحتقر من تقيم حفلات d.g. و غيرها،

لكني بنت عادية جداً أتفرج على الأفلام و أسمع أغاني.. صحيح بأني أحاول التوبة باستمرار لكن دائماً أفشل.

ساعات أحب ألبس على الموضة و أشوف إلي أسمع البنات يتكلمون عنه، و أدخل تجارب جديدة، و أحب و أتزوج من أحبه و يلف بي الدنيا...
و ساعات أتمنى أن أتوب عن الأغاني و الأفلام،، و أحفظ القرآن و أصوم الخميس و الاثنين،، و أكون أكثر التزاما و أتزوج رجل ملتزم...

حينها تذكرت راكان ولد عمتي الذي أعرفه عنه بأنه مو متدين،، و يعيش حياته بالطول و العرض لدرجة بأني اندهشت بأن يفكر مجرد التفكير فيّ،،
تذكرت أخته نوف إلي دايمً سباقة في الموضة في العباءة وغيرها.. و عايلتهم يوم اندهشوا لما شافوني ألبس قفازات لما زرت عمتي نورة في المستشفى،
كنت أيامها أضع مناكير على أظافري و ما أحب أنها تظهر عند الرجال،
أشك كثيراً في هذه الشائعة، فيها شيء غير صحيح،

لكني أيضا تذكرت كلام البنات المدرسة لي و أسئلتهن:
"متى بتزوجين؟"
" ما تفكرين في العرس؟"
" وين ودك تحطين زواجك؟"
كنت أتعامل معها على أنها أسئلة خيالية لكن من الواضح أن عندهم علم بهذه الشائعة،
فكرت: "هل من المعقول أن يتفق أبوي مع عمتي و لا يسألني؟ ثم مستحيل لابد من موافقي على عقد الزواج، و من نادر أن يشيع الخبر بين الناس قبل عقد الملكة"
لكني تذكرت بأن عائلة عمتي تشيع الخبر خطوبة أولادهم بعد تسليم المهر و أحياناً بعد الموافقة مباشرة،

"ياربي وش هالسالفة؟ يعني معقولة يفكرون في زوجة لولدهم أستاذ الجامعة؟ أنا عارفة عايلة عمتي كل عيالهم مأخذين بنات رجال أعمال و مسئولين، و أبوي الشاة السوداء في العايلة،
مستحيل يرضي أبو راكان يناسب أبوي، إلي حتى ما يعزمه لحفلاته الخاصة علشان ما يفشله بسواليفه و كلامه إلي ما يثمنه -كله استهبال و شتايم و خرابيط-
، و ما يفرق معه في مجلس شيخ و لا استراحة شباب!

ما أنكر أن راكان فيه أغلب صفات فارس أحلامي،
(وسامة،
و جسم رياضي_ فهو محاضر في قسم التربية البدنية_
و ثقافة،
و ما عمري سمعت عنه كلمة سيئة،
و ولد عايلة كبيرة و معروفة
و أبوه من أشهر تجار السيارات في البلد)

بصراحة واحد مثل هذا وش يبي فيني؟
إلي أبوي منزل رأس العليا في الطين،
و مأخذه المتوسط في سبع سنين،
و عايشه في بيت ما أدري في أي لحظة أنطرد منه،

ياربي أش كثر أعاني؟"

قلت أخفف عن نفسي:" هانت يا ريمي ما عاد بقى غير اختبارات الرئاسة، ثمن تفضين لكن هذي المشاكل و الأفكار، مثل ما قلت في السنة الماضية أهم شيء دراستي.. و الباقي بالطقاق!"
جمعت الهدايا و أغراضي و ساعدت جدتي لأخرج من المدرسة و أودع أيام الثانوي..

وصلنا خالد للبيت، و طول الطريق كان يصارخ علي، لأني تركته ينتظر ألين طلعنا من المدرسة، و لأنه تأخر عن محاضرته بسبي _من وجهة نظرة_مع أننا قاعدين ساعة نتظره عند الباب!
مع أنه أكبر مني بسنة وحدة بس,, لكنه يعاملني على أني أصغر عياله.
من أكثر من سنة اكتشفت بأن علاقتي بخالد سيئة جداً،، مو بس صراخه عليّ.. و لكن كنا نعيش في بيت واحد كأغراب،
لا نجلس مع بعض،
و لا يهتم الواحد بالثاني،
و ما بينا أي وسيلة للتواصل، مع أنه شقيقي الوحيد،


كانت خالتي تحول حياتنا لجحيم، طول اليوم خناق و صراخ و شتائم و إهانات،
نفطر على" البيت بيت أبونا جو القوم و نهبونا!"
تنغدى على" يا مربي ولد الناس.. يا دقاق الماء في المهراس!"
نتقهوى على" غذني و أعرف أهلي!"
نتعشى" يا غريب كن أديب!"

مع أننا ما سوينا شي ، كل يوم أسئل نفسي"ليش هالكرة؟ ليش هالمعاملة؟"
ثم أتذكر بأنه ما فيها خير.. لا لأمها.. و لا أبوها المتوفي.. و لا لزوجها.. و لا بناتها،
جت بعد وفاة جدي مع بناتها.. و خلت قصر الغدر سجن يهرب منه الكل،
و خلت عايلتها و عايلتنا ..عايلتين مفككتين في بيت واحد.. حياتنا ما بين خناقات مستمرة.. و الهرب من الخناقات، و <<عساها في غيري مو فيّ>>

علشان كذا أتحمل الكثير من خالد على أمل تحسين علاقتنا في يوم من الأيام، لكني أحس بأننا مو قادرين على الحوار البناء،
لكن سهل علينا الصراخ و الخناق و الصعب الجلوس بهدوء و الكلام دون أن ينتهي بمشكلة،

احترام الطرف الآخر معدوم لدينا لأننا نكبت ألمنا و ضيقنا من الخناقات _من طرف واحد دون أحقية في الرد- مع خالتي هتون أو أخوالي و نطلعه على بعضنا،،،

قلت في نفسي"يا ربي ما أبغى أرجع البيت، متى أتزوج و أخلص من هالهم؟
يا حي يا قيوم أرزقني الزوج الصالح
يا حي يا قيوم أرزقني الزوج الصالح
يا حي يا قيوم أرزقني الزوج الصالح
إلي يعوضني خير و يبعدني عن قصر الغدر و أهله "

لكننا رجعنا,, و ولقيت خالتي هتون في استقبالنا في الصالة،
• قالت تتريق يوم شافت أكياسي: يا ما جاب الغراب لأووومـــــــــــــــــــــه!

ما رديت عليها و أخذت أكياسي لغرفتي مع الخادمة.. و خليتها تصورني بعباءة التخرج و الزي الغجري في غرفتي، بعدها غسلت وجهي عن المكياج و لبست جلابيتي و دخلت معسكر المذاكرة، لا هتون و لا راكان ولا خالد و لا حصة ولا حتى مليون واحد مثلهم يخلوني أهمل دراستي بسببهم، يكفي السنين الي ضاعت من عمري....
............................

و أخيراً بدت الاختبارات و انتشرت شائعة بأن أسئلة الاختبارات تسربت في الانترنت،
ما صدقت حتى لقيت البنات يراجعون النسخ للي نزلوه من الإنترنت بعد كل اختبار! ما كان عندي الانترنت علشان كذا كنت أمضي الليل في انتظار مكالمات سوزان لتعلمني بأسلئه اختبار بكرة
و متى هذا؟

بعد ثلاثة أيام من بداية الاختبارات
و بعد صدمتي في الرياضيات ..و الأدب ..و الإنجليزي،
و بعد تشفي حصة لمعانتي في اختبار الإنجليزي،
وبعد اتصال ندى بنت عمي عليّ لتقول لي عن المواقع التي تنزل فيها الأسئلة،
بل حتى وصلني خبر بأنها تعلق الصبح عند بقالات ميد!
لكن في نهاية الأسبوع الأول و أحنا نراجع أجوبة الأحياء
• جت إلينا أستاذة النشاط، و قالت بتشفي: لا تتحمسون تغيرت الأسئلة و هالحين تطبع!

اكتشفت إدارة الاختبارات في وزارة التربية و التعليم تسرب الأسئلة، و صار تحقيق في القضية،

و حتى تظهر نتائج التحقيق و يعاقب المتسبب:
•حجبت كافة النماذج الأولى لأسئلة الاختبارات.
•و صدر قرار( بأن تقوم الموجهات بنقل النماذج من الوزارة إلى المدارس في حقائب مغلقة، و لا يتم فتحها لطباعة النسخ للطالبات إلا بعد دخولهن قاعات الاختبار لحماية الأسئلة من التسرب)!
•و كل موقع يطلع الأسئلة يحجب الوصول إليه زي مواقع الإباحية و الإرهابية!

حسيت يوم سمعت بهذا القرار بأنهم يتكلمون عن وثائق سرية،، في قضايا أمن دولة مو أسئلة ثانوية عامة!!

إما إلي صار بعدها فكان تشديد في التصحيح، بحيث لا يقبل غير الإجابات النموذجية، مما يعني أن معدلتنا ذهبت مع الريح،،

أما من كان الفاعل فقد تم اكتشافه بعد أن لقوا بأن طالبات ثلاث مدارس أهلية مشهورة، كانت كل أجابتهم نموذجية، حتى بعد القرار الصادر!
(((كانوا شارين كافة النماذج للأسئلة و علشان ما يكتشفوهم سربوا الأسئلة على الانترنت)))
و أحنا من تحمل الكارثة،،،!
[القصة هذه حقيقة و حدثت في أحدى الأعوام و سببت أزمة في وزارة التربية و التعليم]

كل هذا كان يخوفني بعد ما خلصت اختباراتي،، و جلست أنتظر النتيجة التي حسيت بأن جهدي طوال العام ما رح يكون له تأثير كبير، تذكرت كلام أعمامي لأبوي بأنه يحولني لمدرسة أهلية أخذ منها معدل لكنه رفض،
حتى مصروفات حفل التخرج و التجهيز له ما عطاني إلا بعد طلوع الروح، و ما كانت كافية و الحمد لله كنت حاسبة حسابي و موفره من مصروفي الشهري طول السنة، و كلها راحت في
Fortune
سمعت صوت جوالي يرن:" أجمل أحساس في الكون أنك تعشق بجنون و هذا حالي معك
خلتني أعيش أيام مليانة بشوق و حنان..."
الغالية ندى يتصل عليك
الو..هلا ندو كيفك؟
الحمد لله، كيفك أنتِ؟ أيش أخبار الأجازة معك؟
ماني حاسة فيها..اسنى النتيجة..كيف إخبار عمي؟ و الوالدة؟
الحمد لله طيبين..يسلمون عليك..أيش ناوية تلبسين في عزيمة عمتي نورة؟
أي عزيمة؟
ما قالك عمي؟
لا أنتِ تعرفين أبوي متى نشوفه أو يكلمنا علشان يعلمنا بشيء.
بيسون جمعة صغيرة في استراحتهم قبل ما كلن يسافر.
ما شاء الله وين ناوين تسافرون ها السنة؟
بنروح لجنوب إفريقيا، و مثل العادة بنمر شقة لندن،
بس ترى جنوب أفريقيا خطرة.
لا تخافين علينا، عيال وزير وعمهم سفير، بتلاقين السفارة مودية معنا طاقم أمني خاص، إلا ما عندكم نية تسافرون؟
و من بيودينا؟ عساني أسجل في الجامعة بس!
أن شاء الله بتلفين العالم كله..هاه أيش تحبين أجيبك معي؟
مشكورة عمري ما أبغى غير سلامتك.
يالله بلا كلام فاضي... أيش ودك أجيب لك معي؟
لا و الله ندو ما له داعي، أنتِِ في كل سفرة جايبة لي شيء،
إلي يسمع كلامك يقول بأجيب لك ألماس من دبيرز، لا تخافين ما رح أجيب شيء غالي ،بأحيب لك حاجة تنفعك في الجامعة؟
ندو الله يخليك ما له داعي.
لا خلاص بأشوف أشياء تنفع في الجامعة و أجيبها لك؟ إلا ما قلتي لي أيش ناوية تلبسين في العزيمة؟
ما ادري، يمكن ألبس بنطلون جينز مع التي شيرت إلي شريته من تخفيضات دكني.
ريمي ما طفشتي من البناطيل؟ ألبسي شيء أنثوي شوي بعدين عارفة كل عماتي بيجون و ما يحبون لبس بنطلون.
بس هو وسيع و ساتر.
قلبي... هالعجز ما يعرفون ساتر و مخلع، ألبسي شيء يناسب العادات و التقاليد، وراء ما تلبسين الفستان إلي لبستيه في حفلة توديع عزوبية العنود بنت عمتي حصة؟ طالع عليك يجنن مرره،،و أنتِ ما شاء الله هالسنة ما حد شافك إلا في العيد!
و الله فكرة، بس لا تعلمين أيش يألبس في العزيمة خليها مفاجأة، و أنتِ أيش ناوية تلبسين؟
ما دري بروح لنجود سنتر إلي جنب بيتنا.. و أدور فستان من اسكادا و لا من روبروتو كفالي، دايم أحب فستاينهم مع أنها مو دايم تناسبني تطلعني سمينة،
>>مسكت نفسي عن قول شيء فندى سمينة جداَ و طويلة لدرجة أن العيال كانوا يتهزون علينا و يقولون جاء لويل و هاري!>>
تدرين ريمي مرة مرة طفشانة، ما صدقت تخلصين اختبارات قلت أدق أسولف معك.
عادي عمري و أنت عارفة غلاتك عندي، لكن صحيح من يوم ما تخرجت من الجامعة و أنتي قاعدة في البيت و وقتك رايح في الأندية و الطلعات و السفر ما تفكرين تشتغلين؟
ما أحب الشغل و قومه الصبح، و بعدين أخرة البنت بيت زوجها....أوه سوري عمري..أشوفك في العزيمة هالحين جايه إلي تسوي لي الواكس.. تشاو.
تشاو..

أنا و ندى نحلم بالزواج و الكوشة رغم اختلاف أسبابنا، لكن يمكن حالتها أصعب مني، فمع أنها بنت وزير لكن ما يتقدم لها الكثير،
و الذي زاد و ضعها سوءً بأنها ما خلصت الجامعة إلا في ست سنوات.. لأنها ما كانت تهتم الدراسة أو العلم
مع أنها ما تعرف الرسوب قبل الجامعة.. فطاقم المدرسات الخصوصيات.. و المدارس الأهلية.. و عائلة عمي التي تهتم بدراسة عيالها.. كل هذا حماها من معاناتي و معاناة خالد
و ما فرق معها معدلها المنخفض.. و صارت تمضي وقتها في اهتمام بنفسها استعداد للزوج إلي ما بعد جاء،
فرغم سمنتها لكنها أنيقة جداً، و بنت دلوعة و أخلاق و ما أعرف ليش يقولون عنها مغرورة؟!

مالمجموع الذي سوف أحصل عليه؟ و هل سأدخل الجامعة ؟
ماذا سيحدث في حفلة عمتي نورة؟
ماهي قصة راكان و خطوبته و هل الإشاعة صحيحة أم لا؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة..

أكمــــــــــــــــــل

الفصل الثالث: "لقاء عند حوض السباحة":

اتصلوا عليّ بالسنترال و قالوا بأن أمي جاية، نزلت إلى الحديقة لألقى الحــــــــــرب الأهـــــــــلــــــــية قد قامت،
عموماً كل يوم تقوم لدينا ما يقل عن مئــــــــة حرب أهلية،، لا أعرف هل من نية أسرتي الكريمة دخول موسوعة جينس للأرقام القياسية؟
أم أن الجلطات التي قتلت جدي و زوج أمي ما كانت كافية!
فكرت "جارة جديدة دقت تبارك بخطوبتي لراكان إلي ما أدري عنها بعد ما دق نصف الجيران"، لكن طلع الموضوع:

قالت أمي: ما صارت ذي، طردوني من بيت أبوي و سكتّ، و هالحين وش يبون بعد؟ من وين نجيب لهم فلوس ورثهم؟
ضحكت خالتي هتون و قالت: ما أدري عنكم.
يوم شافتني جدتي قالت: ريم نظفي غرفتك يبون يجيبون مشتري للبيت؟
ليش؟
أمي: أعمامي يبون ورثهم.
طيب، يصبرون ألين تخلص أوراق أرض بنبان.
ما عندهم صبر.. يبون يزوجون ولدهم.
و أنحنا وين نروح؟ للشارع؟
ضحكت خالتي هتون و قالت و هي فرحــــــــــــــــانة: و الله حالتكم صعبة.
بعصبية: هالحين بأفهم أنتِ وش يفرحك؟! على فكرة ترى لو طلعنا لشارع بتطلعيين معنا.
أنا ما يهمني أطلع للشارع لأن عندي بيت أبو رجلي متى ما بغيت أرجع له،،
لكن إلي يهمني أنكم تـــــــطــــــــــــــلــــــــــــــعـــــــــــــــون للشــــــــــــــــــارع!!

ناظرت إلي خالتي مصـــــــــــــــدومة فيها!!! قبل كنت أظن أنها عصبية..و تبغى تفرض نفسها،
خصوصاً و أنها كانت دلوعة بابا و ماما لمدة 12 سنة ألين طلق أبوي أمي،
و بدت المشاكل و قضايا الحضانة خاصة.. و لأن أبوي مهوب حريص علينا.. فهو تزوج و وجودنا يأثر على سعادته الزوجية.. لكن بعد ولادة أخوي عبد الله.. و اكتشاف أنه معاق حس بأنها عقوبتنا
و كانوا أعمامي كانوا فوق رأسه:
"بر ولدك قبل أن يبرك"
" تراك تحاسب على تركك عيالك"
" الغدر مهوب واجب عليهم تربية عيالك"
"يا أخي فشتلنا قدام الناس تطلق بنات العوايل و تزوج وحدة ما هي من مستواك و ترمي عيالك!"

حتى تم حل القضية ودي (أن الحضانة تصير مع أمي،، و يصلنا مصروفنا شهرياً، و لأبوي و أعمامي حق الزيارة في أي وقت..)

لكن طبعاً تربية أطفال صغار محتاجين،، مدارس ،،و تطعيم،، و كل يوم يمرض واحد منهم، يسحب جزء من دلال و دلــــــع بنـــــــت في 12،

خاصة و أن أمي تزوجت،، و رجعنا للقضية و المحاكم
و نفس الحكم السابق تم الإتفاق عليه من جديد،
لأن أحلى جدين في الدنيا ما بغوا أحفادهم يتربون على يد زوجة أب..

لكن الظاهر أن الخالة الغيورة تمســــــكــنت حتى تمكـــنــت و طردت عيال العليا من بيت أبوها!!
تذكرت أنها كانت تجلس ساكتة في الوقت إلي أعمامها يطلبون ورثهم، حتى ما أني استغربت يوم صارت تدق عمتهم لطيفة على أمي بعد العدة على زوجها.

•و تقول:" يا تعطينا أيجار سكناك البيت أو تطلعين من بيت أخوي!"

خذت أمي ورثها من عيال زوجها،، و استأجرت بيت علشان تتفك من شر الغدر و إذاهم.
بصراحة ما استغرب من أن خالتي هتون لها دور، خصوصاً و أننا ما عرفنا لها طريقة في التعامل..

إذا اشتغلت في البيت راحت تهاوش قدام خالها إبراهيم إلي يجي يهاوشني
و إذا ما اشتغلت راحت بعد.. تقوله أني ما أسوي شي.. و هو يجي يمارس وظيفته في الحياة!

• و إذا جلسنا في غرفنا قالت:"ما يجلسون معنا، دايم في غرفهم، ما أدري وش قاعدين يسون؟ هذولي عيال الشوارع ماشفنا منهم خير"
• و إذا نزلنا شفنا التعذيب النفسي على أصـــــــــــــــولــــــــــه: " أصلا أبوكم راميكم من يوم أنكم بزارين و لا سأل عنكم.."
و ما نقدر نسولف,, أو نضحك,, أو حتى نأكل,, إلا نلاقي أحد يتهزى فينا،

أذكر مرة عمي سعود دخل بندة إلي قريبة لبيتنا, وشاف أخوي خالد و عمره حوالي 16 سنة يتغذى في مطعم صغير ما فيه غير العمال..تضايق و قال "صاير شكله زى إلي ما له أهل"..

على الأقل خالد كان قادر يأكل برى البيت ، مو مثلي إلي طول عمري في رجيم إجباري
ما أجلس على الوجبة حتى يبدى النكد،، و الإهانات إلي تسد النفس
تخلني أكره الأكل و الساعة إلي جلست فيها على السفرة..

(((ذكرياتي كلها سيئة عن خالتي هتون و أعتقد بأني غـــــبــيــة لما أفكر لحطة وحدة بأني أنصدمت فيها!)))

يمكن إلي صدمني خسارتي لخالتي الوحيدة إلي و لا يوم حسيت أنها خالتي!
يمكن صدمني فكرة أن تحاول أي خالة في العالم تدمير حياة عيال أختها الوحيدة -بأي وسيلة- حتى لو كان على حساب تدمير حياتها!
ما أعرف كيف تركيبة ها لشخصية؟
أنانية و خبث و سفالة..
مو معقول أنا دايم أقول بأن في كل إنسان خير و شر، هذي ما شفت إلا الشر فيها
يا ترى هذي كيف عايشه؟
أحنا محتاجين للحب علشان نعيش
و الكرة تجيب الموت
أقلها تعيش كأنك ميت
.........................

حست الجو في الحديقة مسموم..يخنق.. تركت المكان و رجعت لغرفتي بدون ما أخذ فنجال قهوة،
من يوم ما مات جدي و كل ما جت سيرة الورث أنطرد و يقال لي :"مالك دخل".

فخليني أروح بكرامتي أزين.

على العموم الحمد لله أني كبرت عقلي.. و طول أيام الثانوي كنت من أنصار" طنش.. تعش.. تنتعش"
كنت تاركه مشاكلهم كلها.. و لا يهمني شي غير دراستي.. و علاقتي بخالد و أمي وعيالها و جدتي..
طنشت الموضوع كله.. ألين جاء اليوم إلي شفت خال أمي إبراهيم جاي مع شراي البيت

كنت جالسة في غرفتي أقرء رواية (حين إير) و سرحانة في بريطانيا..و كفاح جين علشان تعيش..و ما دريت إلى سمعت صوت رجال جاي من أول الدرج ،،
طليت من الباب أشوف لقيت خال أمي إبراهيم و مع رجل غريب و قاعد يتكلم:
"مثل ما أنت شايف الدرج ينقسم إلى قسمين الجزء الشرقي فيه أربع غرف نوم و حمامين،، و الغربي فيه غرفة النوم الرئيسية بحمامها و بغرفة للملابس ..و البلكونة.. و غرفة نوم صغيرة بحمامها تناسب للطفل الصغير، و بعد ممكن تكون غرفة نوم عادية و لا مكتب إذا حبيت... و يوصل بين الجزئيين.. الصالة العلوية.. و هذا الشباك إلي يغطى الجدار كله يطل على الحديقة.. تعال شف.. شارع التحلية.. من هذاك المطعم تدخل على الحارة... و المنطقة كلها راقية.. و الناس ..إلي فيها مرتبين ..."

ما عرفت وش أسوي؟
وشلون بأطلع هالحين؟
سكرت عليّ باب الغرفة و لبست عبايتي،،
بغى خالي يفتح الباب،
•فقلت: مين؟
•قال: أطلعوا يبي الرجال يشوف الغرفة.
•سمعت الرجال يقول: لا لا ماله داعي هالحين خلنا نشوف الغرفة الرئسية.. هالحين هذي غرفة الطفل؟
•خالي: أيه،، و لا و الله.. بيطلعون هالحين.. خلنا بنروح هالحين للغرفة الرئيسية.. أطلعوا يالله.

رافع ضغطي هالخال..ما يعلموني بأن فيه رجال جاء.. وهذا بيطلعني من غرفتي إلي ما فيها شيء ينشاف.. علشان أيش؟!
على العموم خبرة ثلاث و عشرين سنة في ها العايلة علمتني بأنك لن تجني من الشوك العنب..
سمعت صوتهم في غرفة جدتي هيلة، فتحت الباب و طلعت بسرعة و ركضت للتحت، رحت لغرفة خالد في الملحق لقيته طالع،
وين بتروح؟
أي مكان..
طيب ليش؟
وش يقعدني؟ علشان أنهان؟! يالله أذلفي.. روحي ترى أمي هيلة في مجلس الحريم.
خذني معك.
روحي بس ماني فاضي لك.
و رحت لقيت جدتي هيلة و خالتي و بناتها هاجر و سمر في المجلس جالسين، قعدت معهم و أنا ساكتة أبغى أعرف وش أخرتها؟!
فكرت: "أقدر أسوي شيء؟
لا
ما بيدي شيء أسويه".
•(قلنا لأبوي: البيت بيباع.
•قال: ما أدري؟ دبروا عمركم.. أنا ما أقدر أسوي شيء، إذا صرت رجال البيت فذيك الساعة البيت بيتكم.
•قلت له: ليش أن شاء الله؟! على أيش غزيل رجال البيت؟! على ورثها الي ورثته من أبوها إلي ما ورثها إلا ديون.. و حملك مسؤولية أخوانها الصيع..و لا على شهادتها إلي ما خلصت ابتدائي إلا و هي معك..و لا عايلتها إلي يحمدون ربهم أن لهم أصل بس..
•ما دري.. بس ما بغى ينهد بيتي.
•الله وأكبر على هالبيت، وحدة لا تحترمك..و لا تشرفك قدام الناس..تعاملك كأنك زبالة.. تنوم الليل في جيبك فلوس... تقوم مفلس!.. و باليته على شيء يستاهل... إلا قراوة و بدو و خمام أسواق العويس و طيبة . و محملتك مشاكل أخوانها إلى هالحين.. حضرة النسيب يصرف عليهم.
•ما دري..أنا ما لي دخل.. يعني مو معقولة الغدر يطردون عيال بنتهم.
•ها ها.. هالكلام أيام الشيخ عبد العزيز الله يرحمه..لكن بعد ما مات أبوي عبد العزيز.. و خالي إبراهيم..صار الوصي خرب الدنيا..
•خالك إبراهيم مستحيل يرمي أخته و عيالها الشارع.
•أنت ما تعرف خالي إبراهيم..مخدوع بالمظاهر الكذابة..تذكر أنه حبس أخوه سعد يوم خسر في تجارته.. و هو متسلف من خالي إبراهيم..ما رحمه و لا رحم عياله..
•لا مو معقولة بيخلي أخته علشان أخوات رجلها..
•بيأخذ أخته.. و خالتي هتون بترجع لبيت أهل زوجها بعد ما حققت غرضها.. و أحنا في الشــارع..أنت عارف أنه أيام ما بغت تتطلق أمي هيلة من أبوي عبدالعزيز يوم درت أنه تزوج عليها مسيار يبي يجيه ولد..كان خالي إبراهيم يقول لها.." أتركيه و أتركي عيال العليا و تعالي عندي ما أنتِ مسؤولة عنهم".. و أنه أصلاً ما قعدت معه إلين مات إلا علشانا.. و لا كل فلوسه،، و قصوره،، و أراضيه،، و بعارينه،، ما همتها..
•ما دري شوفو أعمامكم وش يقولون؟
•هالحين من أبوي عمي سعود و لا أنت؟
•طبعاً رده الأخير كان: ما دري.. ما أقدر أسوي شيء!)

صحيت من ذكرياتي الأليمة على صوت خالي إبراهيم
يقول: تراهم راحو أطلعو.
ثم شافتي و قال: وين أخوك؟
قلت: طلع.
قال:و أنتِ وش مقعدك؟ روحي لغرفتك يالله..
قلت في نفسي: "لا و الله وش مقعدني؟! ما أنا كنت في غرفتي مفتكة منكم و من بلاويكم.. و عايشة في أجواء الرومانسية و الخيال..إلين ما طلعتني منها..
يالله بيجي يوم تعرف وش بتصير ريم العليا؟ و تحترمها مثل أصحاب المظاهر الي تلزق فيهم."

ثم مثل العادة رقيت لغرفتي و تركته يكلم جدتي عن الشراي.. و خالتي هتون ..و بناتها فيه.. و ما قال لهم شيء!!
لكن بنت العليا غير بنات هتون..
يوم راح و دقت على الخدامة
•تقول: تعالي للقهوة.
نزلت تحت لقيت مجلس الشورى عاقد جلسته
•كانت هاجر تقول: ما توقعت أنه يعجبه البيت.. قديم و ديكوراته قديمة.
أول ما دخلت.. دفتها أمها بيدها و سكتتها.
يوم رجع خالد قلت له السالفة و أنا مستغربة
•فقال لي:صحيح أننا ما نهتم بالبيت.. بس شوفي البيت كبير.. و تصميمه فخم و حلو.. و في موقع حلو.. يعني تقدرين تطلعين من شارع التحلية إلى شارع التخصصي و إلي شارع العليا العام، و بعدين صاير كأنه قصر فرساي.. رخام روز.. و جدران ملبسة بالخشب الماهوجي..و أسقف مستعارة..و درج رخام ينفصل لقسمين..درابزينه سنديان..و حديقة كبيرة و ملاحق.. و إلي بيشتريه عارف بأنه بيسوي ترميم.. و و يغير الآثاث.. لكن ديكوراته القديمة هذي غالية مرة و قيمة. أحنا إلي ما قدرنا بيتنا..
هالحين ما أدري وين ممكن نروح؟ ما عندنا إلا بيت أمي..بصراحة صعبة تعودنا على عيشة العليا..كل شيء عندنا و الناس مرتبين و كلن في حالة..و بيت أمي صغير و بنحد من حرية عيال زوجها إلي كل يوم داخلين ظاهرين بكيس رز.. و لا تمر،، لا تنسين أنهم يبون يربون عيالهم على طبايعهم،، يعني لا ستلايات و لا غيره..
•طيب هالحين وش نسوي؟
•و لا شيء, نصبر نشوف أخرتها مع أخوالك، و نعيش حياتنا عادي، استعديتي لعزيمة عمتي نورة.
•أيه.. استعديت..
و أنا كل ما جات سيرة العزيمة تذكرت راكان و الإشاعة أياها.
..................
و جاء يوم العزيمة:
•يصارخ خالد: ريــــــــــــــــــــــــم
•رديت عليه: جايه..جايه.
<<دايماً يناديني خالد مبكر لروحات للعزائم، و ما يترك لي الوقت الكافي علشان أطمئن على شكلي ، جمعت أغراضي في شنطتي و نزلت أركض السلم>>
•صرخ علي: يالله ..قطعتينا..
•قلت و أنا ألبس جزمتي: هذني خالصة.
•إذا خلصتي أنا في غرفتي.
•و أنا ألبس عباءتي: هذيني خالصة
•قال و هو يمشي: ما بعد غيرت ملابسي.
•طيب وراك تنادي و أنت ما خلصت.
•خالد من أتباع مبدأ ((خذوهم بالصوت لا يغلبوكم،)) لهذا بأعلى ما في صوته زي ما يكون ممثل يقدم دوره في مسرحية في مسرح روماني أو أوبرا!:
"لأني عارف أنكم ما تخلصون، عارف يا كثر أشغالكم، واحد لازم يقولكم العزيمة في الظهر علشان تجهزون لعزيمة الليل ،،وش إلي يقومكم؟ دايم تتأخرون و دايم تعطلونا..."

عرفت أنه والله لا فائدة من النقاش معه الناتج الوحيد سيكون تأخيرنا و تعكير مزاجي،
•لهذا قلت: رح ..بس رح ألبس.

ما تحركت من مكاني مع أني أعرف بأني بأعرق و يسيح مكياجي، فالمبدأ الأول لدستور بيتنا ( الباب الي يجيك منه الريح سده و أستريح).
و راح لغرفته في الملحق إلي ينام فيه بعد سكن خالتي و بناتها عندنا، و أنتهيت من لبس عباءتي.. و جزمتي ..و لبست أكسسواراتي.. و ساعتي.. و رتبت مكياجي و شعري ، و ودعت جدتي ..و نفذت لها كل طلباتها التي تخطر على بالها ( كاس مويه، تسكير الشباك، فتح التكييف...الخ)
كل هذا.. و صاحب السمو الملكي خالد العليا.. لم يتنازل بالخروج من عليائه.. لإيصال جاريته ريم لبيت عمته!

بعد أن قفدت أعصابي أسلحة مقاومتها.. و اضطريت للجلوس في الصالة أحط يدي على خدي.. و أتفرج على المدفأة الإنجليزية الفاضية.. لأن سمر بنت خالتي تتفرج على سبيس تون.. و ما عندي استعداد أخلي خالتي هتون تذلني على تلفزيونهم.. و أرغمت على استماع لخناقة خالتي هتون مع بنتها هاجر من طرف واحد طبعاً،لأن خالتي هتون لا تترك لأحد فرصة لتنفس:
"تعقنيي يالكلبة بنت الكلب..و تبين تروحين لجدتك السوسة طرفة..
جعلي أدخل بيتها خالي منها
ما رح تنفعك يا الملعونة بنت الملعون..
طالعة على أبوك ما فيك خير
تبون تموتوني..
الله ياخذني و أرتاح منكم
حسبي الله عليكم أنتم و أبوكم....."

و أخيراً تفضل جلالته وشرفني بإحدى صرخاته المعتادة: ريــــــــــــــــــــــــم ياللــــــــــــــــــــــــــــــه.
كانت الحفلة مقامة في حديقة قصر عمتي إلي قريب من بيتنا فما خذنا وقت في الطريق،
•استقبلني نوف عند باب الداخلي للقصر:هلا و غلا يا ريم، كيفك يا عمري؟ كيف حال خالي؟ وحال الوالدة؟
•الحمد لله كيفك أنتِ و كيف حال البيبي؟
•آه متعبني يا ريم ، الله.. الله.. أيش الشياكة هذي؟
•مشكورة حبي كلك ذوق... جاء أحد أو أنا أول وحدة؟
•لا جت عايلة خالي الوليد.. و عايلة خالتي حصة، قلبي تعرفين الطريق بتلاقينهم عند تراس الباربيكو، البيت بيتك، أنا شوي و جاية.

دخلتني الصالة و خذت عباياتي بتحطها في دولاب العبايات وراحت للمطبخ..
و أنا وقفت شوي أرتب نفسي قدام مراية الكبيرة، هذاك اليوم كنت أتشيك مثل ما أكون أستعد للشوفة عايلة خطيبي مو أعمامي،

فأنا ما نسيت قصة راكان كان يشغل تفكيري،، أحلم به ليل نهار،،
لهذا كنت حريصة أكون أكثر البنات أناقة و جمال،
لبست فستان أبيض شيفون مشجر بالورود الحمراء يدلع على رجولي، و استشورت شعري الناعم.. و سويت مكياج خفيف حرصت فيه على إبراز طول رموشي و عذوبة شفافيّ،
و لما تأكدت بأن كل شيء فيني تمام،، نزلت من الباب الفرنسي المفتوح على حمام السباحة للحديقة،
كان الجو رايق يطير شعري.. و فستاني زي ما أكون فراشة رقيقة،
فوقفت شوي قدام حمام السباحة،، كانت الموية صافية تتموج بالموية النازلة من الجاكوزي،، خلتني أحس بالاسترخاء و أسرح في أفكاري،، و أتخيل حياتي حمام سباحة محتاج موية تملاه
زي ما كنت أسوي يوم كان عندنا حمام سباحة،
الي خالي إبراهيم بسده بعد وفاة جدي بدعوى أن ما أحد يحتاجه، و لترشيد استهلاك المياة!

و فكرت في ماذا بعد المدرسة؟ طوال حياتي و أنا أفكر بأني سأدخل الجامعة و أصبح أخصائية نفسية أو أخصائية تربية خاصة،
لكني بدت أخاف و أتشائم فأمي علمتني بأن(( لا أحلم ..و لا أتامل ..لأني ما رح أحقق إلي أتمناه ..و بينكسر قلبي))

ما استطعت تخيل حياتي بدون أن أدخل الجامعة، أبوي مستحيل يدفع لي قرش واحد حتى أدخل جامعة الأمير سلطان أو كلية اليمامة،
لأني بنت منيرة الغدر و مو بنت غزيل،

أبوي فكرت به كثير لما كنت صغيرة،، كانت دائماً تقول لي خالتي هتون بأن: أبوي رامني و خالد و أنحنا أطفال و ما يسأل عنا،
أظن أن المصرف الذي ينزل في حسابي كل شهر دليل على أن أبوي ما نسانا،
إلا أن أحساسي بالجرح من أن علاقتي به ما تتجاوز مصرف ينزل في حسابي، يخلني أحس بأني مواطن درجة ثانية

مواطن درجة ثانية
هذا مفهومي لذاتي = إلي أحسه طول عمري
أشياء كثيرة تخلني أحس بها الشيء:
• رمية أمي و أبوي لي و أنا طفلة.. و كل واحد راح يدور حياته.
•معاملة أخوالي لي كأني سارقة حلال جدي بالعيش في بيته
..أوه عفواً أقصد قصره إلي كأن ما في الرياض واحد زيه،،في الوقت إلي كل الأعمامي ساكنين قصور و فلل.. ما تقل عنه.. و أفخم منه.. و أنا في واحد منها هالحين.
•أبوي و لا مبالاته و فشله في حياته..عكس كل أخوانه الوزير و السفير و الدكتور الاستشاري إلي صارين يحلون له مشاكله.
•رسوبي أيام المتوسط لأني ما كنت أشوف، و أهلي رفضوا يشترون لي نظارة علشان ما أتعود عليها،،هذا غير أني تعودت الإهمال و الكسل و كنت أشوف نفسي ما أفلح في الدراسة مع أني مثقفة و أقرء كثير..
•أمي الي دايم تدمر ثقتي بنفسي و بالناس... و تعلمني التشأوم و الخوف من المستقبل.
•أخوي الي يشتغل في محل ملابس نسائية ، لأنه يبغى يعيش زي باقي عيال عمي و أصدقاءه و المصرف إلي ياخذه من أبوي ما يكفي.
•أخوي الثاني المعوق الذي ما يقدر يقول السلام عليكم..
و و و أشياء كثيرة تخليني أحس بأني ما رح أقدر أتزوج واحد زي راكان أو
فارس أحلامي:
(الي يكون في نفس مستواي الاجتماعي و الثقافي و عنده شخصيتة المستقلة زيي)


ثمن..
حسيت أحساس غريب..
أحساس بأن فيه أحد يناظرني..
ألتفت يساري..
شفته..

راكان؟

أو براد بيت صابغ شعره؟!
ما أدري..
لكن لأنه مستحيل يجي واحد من أكثر نجوم الهيليوود جاذبية في بيت عمتي.. فأكيد أنه راكان
كان لابس بنطلون جينز و شيرت كت.. مطلع عضلاته القوية.. و شايل كرتون موية
و عيونه تأكلني أكــــل..

وش يكون أحساس بنت و فيه شاب يأكلها بعيونه؟!
خصوصاً إذا كان فارس أحلامها؟!
حسيت بأني ما لبست شيء! و أن كل جسمي يشوفه في كاشفات الحديفة.. و الهواء الي يطير شعري.. و يلعب بفستاني..
كنت متجمدة.. و أناظره أبغاه يروح..
ما تحرك..
و ما قدرت أتحرك..
بعدين ما أدري وش قاعد يصير؟
خفت..
عيب أوقف ها الوقفة..
لو جاء أحد و شافني وش بيقول عني؟
رحت أمشي بسرعة..
كان ودي أركض..
بس ما قدرت

تاااااااااااااااااااااابع

..
لما وصلت للبيت الشعر و بغيت ألف أروح لتراس الباربكيو ألتفت عليه..
لقيته على نفس وقفته..
ما تحرك..
و يطالع فيني..

رقيت درج التراس و أنا أرجف،، شفت ندى و أختها ماجدة _المتزوجة و عندها عيال_ و أمهم، و عمتي حصة و بناتها الهنوف و نجود و العنود، سلمت عليهم كلهم و جلست جنب ندى،
قالت لي : هاه شفتي قد أيش طلعتي جنان.
ابتسمت و أنا إلى الآن مرتبكة بعد الي صار عند حمام السباحة تذكرت الموية الي شايلها راكان يا ترى رح تكون الموية الي تملى حمام سباحة حياتي؟
يا ترى راكان رح يكون الإنسان إلي يملى حياتي و يطلعني من سجن الغدر؟
و لا نظراته؟
ما فيه وحدة في العالم ما تعرف كيف تكون نظرات الشاب المعجب بها؟
الحمد لله أني سمعت كلام ندى و لبست الفستان بدال بنطلون و تي شيرت كان ما عرف أني ولد و لا بنت!

•دخلت عمتي نورة و هي تهلي: حياكم الله.. هاذي الساعة المباركة..كيف حالك يا ريم؟ من زمان ما شفناك،
•وش أخبار خالد؟ و أبوك ما تدرين عنه؟ وش أخبار رجلين أمك هيلة ما وديتوها للزهراني؟ تراهم يمدحونه...
•و أنا أرد: و الله تمام.. كلهم بخير.. إلا ودينها بس مثل غيره.. ما لها علاج.
•و ما دريت إلا بعمتي حصة تقول: إلا ما شاء الله يا نورة..أمس شفنا أبو عروس راكان في التلفزيون جاي افتتاح المستفى الجديد مع الملك..

راكان لـــــــــــــه عـــــــــــــروس غيري؟!!

 ماذا سيحدث في قصتي مع راكان؟ هل فعلاً بيتزوج خطيبته؟ أم هل خربت عليهم حياتهم مع بعض؟ أو..
ماذا سيحدث في بيع البيت؟ هل سيباع و نتشتت؟ أم..
ما أخر المشاكل مع خالتي هتون و خالها إبراهيم؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة..


الفصل الرابع:"المفاجأت تتوالي"
(1)

راكان خاطب وحدة غيري
راكان خاطب و حدة غيري
هذا إلي كنت أفكر فيه وأنا جالسة مع أعمامي زي مــيــتــة..

ياربي ليش كذا يصير معي؟ بعد ما شفته و حرك شيء جواتي.. أعرف أنه خاطب وحدة ثانية؟!
لأنه مستحيل يروح أبوي مع الملك و لو حتى سواق ولا فراش
أصلاً مرتبته ذي.. ما وصل لها إلا بواسطات أعمامي..
صــــــــــــــدق أني غـــــــــبــــــــــيـــــــــــــة إلي توقعت بأني ممكن أخذ راكان
و لا واحد من عايلته

فكرت بأن جمالي.. و شبابي.. و دراستي.. و أخلاقي.. كافية تخلي إي شاب محترم يفكر فيني!

نسيت أن هالأيام ينخطب أبو البنت مو هي..
بدليل أعلب الزواجات الي أحضرها (بنت عادية ما فيها أي ميزة غير منصب أبوها .. تتزوج شاب مميز أكثر منها جمال و ثقافة)

بغيت أعرف ليش صار كذا؟ ليش الناس قالوا أني بأتزوج راكان؟ من هي إلي راكان أو أبو راكان في أغلب أختارها لتكون زوجته و أم عياله؟
•سألت ندى: هالحين راكان بيتزوج؟
• أيه توهم دافعين المهر .. بس ما رح يكون فيه زواج لين تخلص فلة راكان..
•من بياخذ؟
•ريما بنت محمد العليا..عيال عمنا من بعيد.. أبوها موظف على المرتبة الخامسة عشر في وزارة الصحة.. هذيك إلي كانت لابسة في عرس نوف فستان الأسود زي فستان لطيفة إلي لبسته في مهرجان قرطاج، ما تذكرينها؟
أذكرها
..سمينة... و حلوة...و شيك..و مغرورة!!

عمري ما تخليت إلي بيجي اليوم إلي بأصير أنا وياها في منافسة على شاب واحد، ياترى وش عجبها فيه؟
شهادته و لا عضلاته
و لا فلوس أبوه غالباً..
عرفت هالحين وش سبب الأشاعة؟
((تــــــــشـــــــــابــه أســـمـــاء!!))
و أكيد عمتي قالت لجيرانها أن ولدها بياخذ ريما بنت محمد العليا..و مع انتقال الخبر بين الجارات خصوصاً و أننا ساكنين قريب من البعض
قالوا جيرانهم لجيراننا أن:
"راكان بياخذ بنت خاله محمد ريم"
و أنا زي الهــبلــة صدقت!
وش بيكون شكلي قدام الجيران؟

تذكرت نظرات راكان واضح جداً أني شــلــيــت الولد!
و ما قدر يحرك شيء في جسمه غير عيونه إلي تلاحقني!
مع أنه ياما سافر برا و شاف بنات أشكال و ألوان..

لكن حرام ما رح أسوي شيء يغضب ربي
بأحاول أنساه.. و هو حر أنا في بيت أهلي يعرف الطريق لو كان يبيني
لكن لو كان يبغى خطيبته.. الله يوفقه و يرزقني من هو أحسن منه.
و الحمد لله أن ما صار بينا شيء أكبر

هو كان فيه مواصفات فارس أحلامي؟
و طول عمري ما فكرت فيه إلا أنه ولد عمتي بس.
لكن بعد الإشاعة فكرت فيه لفترة قصيرة..


الشيء الي ضايقتني مو أنه طار مني
لكن..
أني حاسة أنه مو ممكن واحد زيه يخطبني..
ليش؟
لنفس الأسباب الي خلتني أحس بأني مواطن درجة ثانية..
.......................
(2)
لما قمت بكرة الصبح نزلت الصالة و ما لقيت أحد قايم..
سويت لي شاهي و سخنت سينابون و جلست أفطر و أقرء جرايد في الصالة،،
دق التليفون
رديت عليه: ألو.
خالي إبراهيم: ألو، السلام عليكم،، ريم.. وش قاعدة تسوين؟
أفطر.
وين خالتك هتون؟
نايمة.
و أمك هيلة؟
نايمة.
قوميهم كلهم و قومي خالد و قولي لهم يرحون للمحكمة ، أنا دقيت على أمك منيرة و سبقتهم.
ببراءة: ليش؟
بعصبية: مالك دخل، سوي إلي أقولك عليه و أنتِ ساكتة
طيب، تبي شيء ثاني؟
لا، مع السلامة.
مع السلامة.

دقيت بالسنترال عليهم كلهم ما حد رد..
تو الساعة تسع و الكل في سابع نومه
فرحت أقوم جدتي و بعدين رحت للخالتي هتون ثم نزلت و رحت أقوم خالد،
دق التليفون من جديد و كلمته خالتي هتون

•سمعتها تقول: "خالد هو إلي أخرنا ما بعد قام."

جدتي و خالد ما كانوا يعرفون ليش بيروحون و حتى أمي منيرة..
•دقيت عليها أسئلها: وش القصة؟
•قالت: ما أدري،، خالي توه داق عليّ و قومني من النوم، و لا أدري وش السالفة؟ يا خبر اليوم بفلوس بعد ساعة ببلاش.

جلست في الصالة أتنظرهم يرجعون،
قلت لنفسي: "يا ريم وش يجلسك؟ هالحين بيجون و يطلعونكم من البيت، روحي أجمعي أغراضك الغالية.. لا تضيع."
ثمن رجعت و قلت: "وين أحنا فيه؟ إسرائيل؟! أصبر ألين يجون و أعرف السالفة كلها و أكيد رح يتركون لنا وقت علشان نجمع أغراضنا."
و جلست أكمل قراءة الجرايد بشكل عادي زي كل يوم!

و في الظهر رجعوا و سمعت الأخبار كلها ببلاش:
البيت الي كانوا يبون يبعونه؟؟

مرهـــــــــون بـمـــلــــــيــــــون ريـــــــــال لجارنا عبد الكريم تاجر الأسهم!!

و كان ساكت إلين يخلص أخوي خالد جامعته و يتوظف، لأن ما حد يعرف أنه يشغل في محل ملابس.. و لو عرف مارح يتعامل معها بشكل جدي،، لأن راتبه ما يكفي يفتح بيت

أو ألين يبعون أرض بنبان إلي عليها مشاكل مع الشركاء..
لكن لما شاف بأن البيت بيباع.. راح لخالي إبراهيم و كلمه.. و خـــرب البيعة،
و قدم طلب بأن ورثة جدي عبدالعزيز يدفعون الرهن

الشيء الي اندهشت منه أنه معقولة ما دخل الرهن في حصر الإرث؟!
فعبد الكريم رجل أعمال.. و عارف السوق و القوانين،،
لكن أكيد أن الوكيل الشرعي للورثة
(خالي إبراهيم)
عارف بأمر الرهن
و كان يقدر يقول للأعمام أمي ..أن البيت مرهون.. يوم طالبوا بالورث..
و نخلص من كل إلي صار من جيبه الشراي البيت..
لكن ليش ما قال؟
لأنه كان ناوي يبيع البيت و يسدد جزء من الرهن و يعطي أعمام أمي ورثهم..
و يحقق حلمه و حلم خالتي هتون
((يــــــــــــــــــــرمــــــــــــــــيــــــــــــــنا في الشـــــــــــــــــــارع))
لكن
عبد الكريم متفق مع جدي في عقد الرهن أنه ما يبيع البيت إلا له
أو على الأقل يرضى عن إلي بيشتري البيت
فقلب الطاولة عليهم و على مخططاتهم..

أتفق معهم في المحكمة ودي أن بعد بيع أرض بنبان ياخذ فلوسه..
و جدتي هيلة رفضت بيع البيت..

فما قدرت لا هتون و لا إبراهيم الغدر يحققون هدفهم الأسمى
((طرد عيال العليا من قصر الغدر))
لكنهم حققوا نتيجة الي حاولت أنها ما توصل إلى هالمرحلة كثير و كثير
كلهم طاحوا من عيني
و خسروا أي أحترام ممكن أعاملهم به

عطيت كل الغدر
خالتي هتون
و خالها إبراهيم
و أعمامها
Game over))))


لما عطيته زميلاتي
كان المعيار الوحيد: هو هل يحبوني و لا يجاملوني؟

لكن أخوالي أثبتوا لي بأن الدم يصير ماء.. و تراب بعد..
علموني أيش الألم و القهر؟!..
وضحوا لي قد أيش ينخدع الإنسان في أهله و عزوته؟!...
أنذليت.. و أنهت.. و طردت من غرفتي وسط النهار..
شفت قد أيش توصل الدناءة بالناس؟!

عرفت بأنهم no thing
و لا شيء
و مثل ما قلت "أنك لن تجني من الشوك العنب"

"مع الأسف يا أخوالي عرفت أنكم حقيرين.. و أنذال.. و ما فيه أمل يوم من الأيام أرجع
أحبكم
أو أثق فيكم
أو احترمكم .
و الآن على الأقل ما أسمح لكم تخدعوني من جديد"
.................
(3)

دقت علي سوزان
و قالت: هلا ريم سمعتي الأخبار؟
قلت: و عليكم السلام في الأول. وشو خبره؟
قالت: اليوم بتزل النتايج في الجرايد..
قلت: صدق؟ قولي قسم.
قالت: و الله.
قلت: متى؟
قالت: الليلة أن شاء الله. يالله قلت أعلمك و بدق أعلم الجوهرة.bye.
قلت: bye.
و سكرت السماعة و قلت لنفسي: "و يقولون أني عجلة و مخفوفة! من عاشر القوم أربعين يوم صار منهم! يا حبي لك يا سوزي طايرة تبي تعرف نتيجتها الله يوفقك و يوفقني."
و نزلت بسرعة على الدرج، و رحت جمعت الجرايد ..الرياض و الجزيرة و الشرق الأوسط..
و قعدت على التليفون أتصل على كل الجرايد.. من الساعة ثنتين الظهر إلين الساعة ثلاث الفجر... ما كلت و لا شربت.. و يالله أقوم أروح أصلي..
يا ما يردون علي ...
يا يقولون.. "ما بعد وصلنا شيء"
و أخيراً بعد الساعة ثالث الفجر كلموني .. و ما بعد تحويلة إلى تحويله رد علي واحد
قال لي: أي اسم؟
قلت: ريم العليا.. و سوزان (........) و الجوهرة (........).
قال: مبروك.
قلت: كــــــــــم؟
قال: ما أدري..عندي أسماء الناجحات بس.
قلت: طيب.. شكراً..مع السلامة.
قال: مع السلامة.

أرسلت رسالة إلى الجوهرة و سوزان أبارك لهم بالنجاح..
و طيــــــــــــــران رحت لجدتي و دخلت غرفتها في الظلام
•و قلت لها: يمه.. يمه هيلة.. نجحت..
•قالت وهي نايمة: هه..
•قلت: يمه.. نجحت..نجحت.. ما قدرت أنوم قبل ما أقولك..
•قالت: الله يوفقك.. و لا يسلط عليك ظالم ..و يعزك.
جيتها و هي راقدة على السرير.. و بست رأسها
•و قلت: الله يخليك لي يمه.. و لا يحرمني منك..
و طلعت من الغرفة و رحت كتبت رسالة تهنئة للأمي و أبوي..
" صرح مصدر مسؤول بأن ريم محمد العليا قد نجحت في الثانوية العامة"..
ثم رحت أنوم كنت أحس بأني بنت عادية فرحانة بنجاحها، و راكان،، و بيع البيت،، صار مجرد ماضي ما بقى منه غير الذكرى.. لكن الأيام لها كلمتها

يا ترى هل أنتهت قصتي مع راكان أم أن لها ذيول؟
بعد ما فشلت خالتي و خالها في مخططهم اللئيم ماذا سيفعلون؟
هل ستكون نسبتي كافية لدخول الجامعة؟ و هل سأدخل الجامعة أم سيعيقني أمور أخرى؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة..

الفصل الخامس: "مرحلة جديدة في حياتي":
(1)

قمت الصبح الساعة تسع،، و رحت أشتري الجرايد علشان أشوف اسمي،، و مثل أمس رابطت عند التليفون، أستنى المهنئيين_شايفة نفسي وزير أو مرشح مجلس بلدي!!_
و ما أتصل أحد!؟
فدقيت على كل البنات إلي عندي أرقامهم أهنيهم
و لا وحدة كلمتنيّ!

يا تكلمني أمها
أو أختها
أو الخدامة!!

و حتى سديم -الله يهديها- ما عرفت أنها ناجحة إلا لما دقيت عليها
و ردت علي أمها
وباركت لها
و استغربت؟؟ النتايج طلعت؟!
•فراحت تصحي سديم تقول لها: فيه واحدة داقة تقول أنك نجحتِ؟!
•فكلمتني سديم و فيها النوم: هه..هلا من معي؟
•قلت: أهلين سدومة، أنا ريم.. مبروك نجحتي.
•قالت: من يقوله؟!
•قلت: طالع اسمك في الجرايد مع الناجحات.
•تثاوبت و قالت: لاه..و أخيراً عتقنا من اختبارات الوزارة..آي جريدة؟
•قلت: كل الجرايد.. أنا شفته في الجزيرة و الرياض..
•قالت: طيب..مشكورة عمري..بروح أشوف الجرايد..تأمرين على شيء
•قلت: ابد سلامتك bye..
•قالت: bye see you.

دق علي أبوي
و قال: السلام عليكم.. ما لقيت اسمك في الجرايد..وينه؟
قلت: و عليكم السلام..وين ما لقيته؟ في الجزيرة و الرياض..
قال: هالحين وش اسم مدرستك؟!
قلت:***.
قال: أيه..هذي الأسماء الي قدامي جمانة عبدالله ال.....، جنى عبدالرحمن ال....، ريم حمد ال...
قلت: أصبر..أصبر.. الله يعافيك هذي اسماء بنات الأدبي..أنا علمي.
قال: هالحين أنتِ علمي؟!
قلت: أيه.. من ثاني و أنا كل عزيمة أقولك، و ما بعد حفظت؟!
قال: أنا وش دراني؟ عساني أحفظ عيالي في أي سنة.
قلت في نفسي: "و أحنا من عياله؟!..مجهولين النسب؟!"
قال: هه هاذني لقيته..ريم محمد العليا، يالله مع السلامة.
قلت في نفسي:" طيب قل مبروك على الأقل"

و بعدين طفشت من الجلسة قدام التليفون ولا حد حس فيني،
فرحت أفطر بس أول ما دق التليفون تركت إلي في يدي و رحت أرد
بدأت التهاني ترد
من أعمامي
و صديقاتي
و بعض أخوالي حتى وحدة من عمات أمي إلي تورث معهم
و دقت علي أمي وحدة من أقاربنا يشتغل ولدها في لجان رصد الدرجات، و باركت لنا و قالت: بأن معدلي 94%..

يعني أقدر أدخل القسم الي أبغاه..الحمد لله.. الحمد لله لك يارب..

و كل هذا و خالتي هتون (قطة فوق تنور ساخن)
شوي و بتنجن!!
ما تحملت كل شوي يدق أحد يبارك لي، و هي لو أنها كانت عاقلة... و كملت دراستها كان نصف التهاني اليوم لها،
شفتها العصر تكلم التليفون:
•"الله يبارك فيكِِِ.....عقبال عيالك ..هه .. لا.. لا..لا..مو موجودة في البيت هالحين..مع السلامة"
•سألتها: مين متصل؟
•قالت بغضب: مالك دخل!
•قلت: لا بس توقعت أنها تبغى تكلمني.
•قالت بعصبية و صراخ : لا..وش تبيبك؟ و بعدين من شايفة نفسك؟ لا أنتِ أول وحدة و لا أخر وحدة تأخذ الشهادة..بليها و أشربي مويتها.. مير أن شاء الله أن شهادتك
تصير مثل قلتها.. و ما تحصلين شيء منها..

كـــــــــــل ها لحــــــــــســـــــــــد ليــــــــــه؟؟!!
ما أحد قال لها لا تكملين دراستك، إلا جابوا لها واسطة يوم بغت تكمل..
دخلت خربت سمعتي و طلعت!!

و أنا شفت الــــويـــــل إلين خلصت المتوسط في سبع سنين!!
في مدرسة همها حشو مواد بدون فايدة..و ما عندها أي مشكلة نصف,, أو ثلاث أرباع الدفعة راسبة في مواد سهلة، و بدل المرة مثنى.. و ثلاث..و رباع!
في وقت ما كنت أشوف السبورة... و الكتابة عليها زي الضباب ما أعرف أقراه..
و ما شريت نظارة إلا في بعد خمس سنين لأن جدتي كانت رافضة علشان ما أتعود عليها..
و أمي و أبوي كل واحد مشغول بحياته.. و أنا و خالد أخر أهتماماتهم!
و أساساً التعليم ما له أي أهمية عندهم!
و في حياته أحد ما ذاكر لي ..أو علمني كيف أذاكر!
لأن جدتي جاهلة.. و جدي يالله يعرف يقرء و يكتب..
و كان الانجليزي عقدتي طول المتوسط و أولى ثانوي.. حتى درستني المعلمة أمل.. في ثاني و ثالث وساعدتني.. على أني أشارك و أحاول أفهم،
و حولت عقدتي إلى تحدي.. فزت فيه بامتياز و تميز في ثالث ثانوي.


في بيت كله مشاكل و تشتت،
في حياتي ما عرفت معنى أسرة مستقرة؟!
أنولدت و تطلق أبوي و أمي..
و فترة طفولتي عشتها في دوامة المحاكم و قضايا الحضانة..
في بيت يشوف كل عايلة أخوالي أننا سرقناه بنذالة.. و حرمناهم من فلوس و اهتمام جدي عبد العزيز..

حتى جدي وجدتي ما كانوا مرتاحين
على أخر عمرهم كل واحد يقول لثاني:
•" أنا ما أحبك بس أهلي غصبوني عليك ياولد\ بنت عمي!"

و النتيجة الطبيعية ضيع جدي فلوسه في زواجات المسيار

بحثاً عن الحب الي ما عرفه و الولد الي ما جاه
ألين جته جلطة بسبه وحدة من زوجاته،
صار بعدها زي الطفل محتاج للي يأكله و يغير له ملابسه,,
صبرت عليه سيدة الجلطات شهور.. ثمن طلبت الطلاق و المؤخر..بعد ما لقت ضحية جديدة...

و بعد مات تحملنا تدخل هالأخوال إلي ما شفنا منهم غير الدمـــــــــــار
سيطرة.. و إهانات.. و معاملة زفت
طلعوا كل عقدهم.. و كراهيتهم علينا
لما أشوف كيف يتلزقون،، وينافقون ،، و يضربون تعظيم سلام لأعمامي.. الي لولانا ما ردوا عليهم السلام!
و أشوف كيف يعاملونا زي ما نكون عبيدهم و جواريهم؟!
استغرب لها الدرجة الحسد و الغيرة و الإحساس بالنقص تسوي بالناس؟!

و لا ليش الظلم؟ الوحيد الذي كان يتدخل و يذينا..خالي إبراهيم.. أما الباقي فما شفنا منهم إلا كل خير..إلا طلبهم لورثهم.. و المال عديل الروح..


بس الصراحة خوفتني خالتي هتون
يا ترى بأدخل الجامعة ولا لا؟
فمع تضخم المعدلات.. صارت الاختبارات زي القمار!!
نضيع سنة كاملة من عمرنا نرابط.. و نجاهد.. و نحارب.. علشان نحفظ المناهج و نكتب أجوبة نموذجية في ورقة الإجابة و نأخذ الدرجة الكاملة...
و حضك نصيبك
يا يطلح فــوق و تذكر كل كلمة في الإجابة على الأسئلة و تدخل كليات القـــمة..
يا ينزل تحــت و تنسى و تكتب من مفهومك و تخسر كل شيء..
لأن آخر شيء يؤثر في معدلك:
قدراتك الخاصة
أبداعك
مواهبك
المهم الرقم المسجل في الشهادة! أما مستواك العلمي و قدرتك على التعلم ؟؟؟؟
هذا فتح مجال لسياسة العرض و الطلب.. في الدروس الخصوصية.. و المدارس الأهلية
أدفع عشرة.. عشرين.. ثلاثين.. أربعين ألف ريــال.. و تأخذ الدرجات الكاملة في أعمال السنة!
......
(2)


..................
!

بعد أيام لما طلعت مواعيد التقديم للجامعة اتصلت على أبوي أطلب منه دفتر العائلة و أقوله بأني ناوية أدخل جامعة الملك سعود
•وشو له؟ علشان توظفين في أعلى جبل في عسير!! أنا لو كنت ريم بنت محمد العليا كان جلست في البيت إلين يجيني ولد الحلال..
•أبوي الله يخليك..ذبحت نفسي مذاكرة سنة كاملة.. في مدرسة حكومية و جبت معدل.. و طول عمري ما خذت دروس خصوصية.. علشان تقولي انتظري ولد الحلال؟!
•مشاوير و مصاريف ما لها داعي!! و أخرتها؟ يا تجلسين في البيت.. يا وظيفة في أخر الدنيا.. من يروح معك؟ ماله داعي تعب و مشاوير على الفاضي!
•أبوي.. الله يرحم والديك.. لا تحرمني من دراستي. و بعدين وين ولد الحلال هذا؟ هالحين الشباب ما يبون إلا الجامعية.
•أنا تزوجت ثنتين و لا وحدة فيهم معها أكثر من متوسط و لا همني..

قلت في نفسي: "و من قال لك أني أبي أتزوج واحد زيك؟ معه الثانوي و بعقلية جاهل!.و فاشل.. و ضعيف شخصية.. و ما حد يحترمه..
و لولا أخوانك كان صرت مديون و مفصول و مسجون! و البركة في غزيل و أهلها.."
•هذاك أول يا يبه..أيام ما كان الراتب الواحد يكفي العايلة..هالحين مع ها الغلا..كل الشباب يبون موظفة..
•من قالك؟ هذي ندى بنت عمك الوليد مخلصة كلية من سنة..و لا توظفت و هي بنت وزير!
•ندى أصلاً متخرجة بمقبول.. وهي إلي ما تبي الوظيفة..بعدين مثل ما قلت بنت وزير.. نفوذ و فلوس أبوها..تنفعها.. أما أنا وش عندي؟
•ما أدري بعدين ترى الشباب ما يبون الجامعية.. علشان ما تشوف روحها عليهم..

قلت في نفسي:" أيه هين..علشانهم ما بغوك يوم خطبتم..و في أخير ما لقيت إلا هالعلة إلي ما كملت الإبتدائي.. ألا في بيتك.. و تصرف على أخوانها الصيع من فلوسك!"
•و إذا طلقني و لا مات وش يصير لي؟
•في كل الحالات ما نتي لاقيه وظيفة فليش الخساير و المشاوير؟!
•و أنا أصيح: أبوي.. الله يخليك ..لا تحرمني من دراستي.. ترى و الله لا أجن..كفاية الحرمان الي شفته في حياتي.
•أقول عن الخرابيط..ما له داعي تعتبينا بالمشاوير و روحة الجامعة و الفساد! مع السلامة.

و سكر السماعة في وجهي!
حسيت في ذيك اللحظة أن حياتي انتهت!
..................
(3)

كافحت سنين لوحدي بدون مساعدة من أحد،، بالعكس كان البيت و المدرسة أكبر عوائق لنجاحي.. ثمن بعد كل هالتعب يقولي وشو له مشاوير؟!
الجامعة مو بس شهادة و وظيفة.. لكن ثقافة.. و علم... و دور في المجتمع.
لما دق علي عمي سعود كنت منهارة تماماً، حاولت أتماسك و أرد بصوت عادي:
الو.
الو السلام عليكم..كيف حالك ياريم؟
و الله تمام.. هلا عمي كيفك أنتِ؟
الحمد لله،، وش أخبارك؟ و أخبار خالد؟ و الوالدة ؟ و أمك هيلة؟
الحمد لله كلهم طيبين..كيف أخبار أم عبد العزيز و العيال؟
و الله تمام .. إلا ترى اليوم نزلت مواعيد التسجيل في جامعة الملك سعود في جريدة الرياض، أنتِ كم نسبتك؟
94%.
ما شاء الله على هالنسبة الزنية تقدرين تدخلين طب، إلا وش ناوية عليه؟
>>حاولت أمسك دموعي<<
مارح أدخل الجامعة.
تبين الكلية؟
لا بس أبوي رفض أكمل دراستي.
وش هالكلام؟! ليش أن شاء الله؟!
يقول مشاوير و أخرتها وظيفة في أعلى جبل في عسير.
لاه.. مو معقول! وبعدين المهم الشهادة.. أما الوظيفة فالأرزاق بيد رب العالمين.
>>هالمرة صحت من جد<<
حاولت معه يا عمي بس ما رضى.
لا تضيقين صدرك يا بنتي..بأحاول أكلمه أنا و أعمامك ..و لا يصير خاطرك إلا طيب..مع السلامة.
الله يجراك خير يا عمي..مع السلامة.
في ذيك اللحظة حسيت بالقهر.. و أني أقل من بنات أعمامي وأخوالي
إلي مدارس أهلية
و دروس خصوصية
و أهل مهتمين فيهم
و بأخير يجيبون لهم واسطات.. و يذلون أنفسهم للي يسوى و إلي ما يسوى.. علشان يدخلونهم الجامعة
و أنا
جايبة معدل يرفع الرأس
بدون كل إلي توفر لهم
إلا ساكنة في بيت يطلبون مني
ليلة إختبار الرياضيات النهائي
أقدم الضيافة لأم الجيران!!
و أحتاج واسطة علشان يسمح لي أبوي أكمل دراستي.. لأنه شايل هم المشاوير و الزحمة!
أما جلستي في البيت لا شغل و مشغلة عاااااااااادي!
..........
(4)
و الحمد لله قبل أبوي برغم عنه.. بدخلتي للجامعة.. و عطاني دفتر العايلة و رحت أسجل في الجامعة
و بعد وقفة طابور.. و تعب ..و قرف..
لقيت أن أكثر الأقسام vip أكتفت
الحاسب و الإنجليزي و القانون و التربية الخاصة..الخ
دخلت علم نفس الي كان على وشك أنه يكتفي.

و دخلت مرحلة جديدة في حياتي
مرحلة قررت أني أكون بنت الجامعة..
مرحلة أكون فيها بنت مستقلة
لي مكافأة طالبة..
و أروح و أجي للجامعة بالباص..
و ما عندي أحد يسأل عني إذا غبت..
و لا جيبي ولية أمرك إذا صارت لي مشكلة...
مرحلة أنا فيها ولية نفسي
أعرف نقاط قوتي و ضعفي و أطور من نفسي
و لا يهمني أي أحد
قررت أني أنسى راكان و غيره و ما أنتظر أحد يعبي لي حياتي..
أنا إلي أملاها بدراستي.. و أنشطتي.. و أستفيد من دخلتي جامعة الملك سعود.. الأكثر تميزاً في الأنشطة اللامنهجية..من كل الجامعات و المعاهد الحكومية في الرياض على الأقل..
..........
ماذا سيحدث لي في الجامعة؟
يا ترى ماذا مع راكان هل سيترك خطيبته من أجلي أم ؟
يا ترى بعد دخولي الجامعة.. و تدخل جارنا و منعه للأخوالي من بيع البيت.. هل سيكفون عن أفعالهم أم سيحاولون من جديد بـأساليب جديدة؟
أنتظر إجابتكم على هذه الأسئلة أو
تابعوني في الفصول القادمة لأجيب على كل هذه الأسئلة و للأحداث المثيرة القادمة..

الفصل السادس: (فتاة المجمعة)
(1)

و أخيراً جاء أول يوم في الدراسة، ما نمت الليل كله من الحماس و الخوف، قعدت انتظر الصبح على أعصابي،
وش بيصير بكرة في الجامعة؟
كيف أعرف وين محاظراتي؟
و شلون الدراسة؟
طلع الصبح
لبست بلوزة بيضاء و تنورة سوداء >>>زي ما قالوا لي لما سجلت<<<
و استشورت شعري.. وسويت بوف.. و حطيت مكياج خفيف نهاري.. و خذت الشنطة الي جابتنها لي ندى من جنوب أفريقيا
و جلست أنتظر أبوي.. لأن ولي العهد الأخ خالد رافض أنه يوديني.. علشان عنده محاظرات
و في الطريق بعد ما دخلنا شارع التخصصي
قلت لأبوي: أبغى أشتري فطور من د.كيف.
قال: وينه فيه؟
قلت: في هايبر بندة قبل ما يجي.. مستشفى الملك فيصل التخصصي.
قال: طيب.
كنت أحب هايبر بندة إلي على شارع التخصصي،
تبغى تشوف امريكا في الرياض.. رح هناك
هذيك المنطقة مرة هادية راقية..و كل الي يجيها ناس مرتبين و محترمين..نادراً ما تشوف فيه تصرفات سوقية زي شارع التحلية..إلي كل من هب و دب يروح له ..
هناك فيه فندق الانتركنتونتال و نجود سنتر.. السوق الأول للطبقة المخملية
علشان كذا حبيت أحتفل بأول يوم دراسي لي بشراء فطور من هناك،،
شريت هوت موكا و تشير كيك،،حاولت أشرب شوي من الموكا،، حتى ما ينكب على السيارة و أحنا نمشي لكنه أنكب على بلوزتي،
يا ربي طبعاً مستحيل أبوي يرجعني البيت علشان أغير بلوزتي، فرحت الجامعة أول يوم ببلوزة وسخة! و صرت أحاول أغطيها بالشنطة..
دخلت من بوابة 2، و وقفت بنت
•سألتها: وين أخذ جداول المستجدات؟
•أي قسم؟
•علم نفس.
•روحي لمبني 15 الدور الأول عند منسقة كلية التربية.
•وين مبنى 15؟
•أطلعي من البوابة و قدمي يسار ثمن تلقيه.
•شكرا.
•العفو.
و رحت لمنبى 15، و أنا خايفة أضيع شفت البنات كثيرين، وأشكال و الألوان،، حسيت نفسي وحيدة،، ياليت سوزان و لا الجوهرة جو معي،
بس سوزان دخلت طب في الملز.. و الجوهرة ما جابت غير 89%. فما حصلت تسجيل في الملك سعود راحت للكلية الأقتصاد المنزلي و التربية الفنية،
<<يا خسارة دراستنا للعلمي و أخرتنا أقسام أدبية!<< يمكن بس سوزان الي قدرت تدخل كلية علمية...و كلنا في أقسام متعبة.. فصعبة أننا نتواصل
•خذت جدولي و قالوا لي: روحوا خذي القاعات.
•سئلت: من وين أخذه؟
•قالوا: دوريه.
دخلت على وحدة جالسة على مكتب شكلها في مثل عمري
و سألتها: أستاذة ..لو سمحتي..وين القاعات؟
رفعت رأسها من الكمبيوتر
وقالت: أنتِ أي مستوى؟
قلت: مستجدة.
قالت: يعنى الإعداد العام... شايفة الزحمة الي عند اللفت؟
قلت: أيه.
قالت: هذولي بيصيرون صديقاتك..هناك جدوال قاعاتكم...ترى أغلب قاعاتكم في مبنى 24 ..مبنى كلية التربية.. و العرب يا في نفس المبنى.. يا مبنى الأداب25.. و النجم في مبنى اللغات و الترجمة 19..بس أنتبهي لرقم الشعبة لازم تروحين لنفس شعبتك..
قلت: هالحين الشعب هذي ليش؟
قالت: أنتِ في المدرسة كان عندكم فصل ثالث\ أول، ثالث\ثاني..هنا فيه كل مادة لها فصول خاصة فيها..
و كل فصل أو إلي نسميه "شعبة" له استاذة و طالبات مختلفين عن الشعب الثانية.
قلت: شكراً أستاذة.
قالت: العفو.. حبيبتي الله يرضى عليك.. سكري الباب و أنتِ طالعة.

طلعت و أنا أكلم نفسي "و الله أنها حبوبة..يا رب تدرسني"
شفت الزحمة قدام اللفت.. و تذكرت كلامها أنهم بيصيرون صديقاتي،، ياترى بلقى صديقات زي الجوهرة و سوزان؟
يا ترى بأتكيف مع بنات الجامعة و لا بنات الثانوي غير؟
قطع أفكاري لما شفت حصة زميلتي في الثانوي،،جاية عندي
•سألت البنات: هذي شعب الدورة التاهيلية؟
•قالت وحدة: لا هذي شعب بنات التربية الرسمين،، الدورة التأهيلية في الناصرية.

ألتفت علي فابتسمت
•و قلت: السلام عليكم.
•قالت: و عليكم السلام..أنتِ أي قسم؟
•علم نفس..و أنتِ؟
•تربية خاصة..أنا قايلة من أيام الثانوي أني بدخل تربية خاصة..أنتِ وشلون دخلت الجامعة؟
•مثل كل الناس..جيت في موعد تسجيلي.
•أنتِ دورة تأهيلة؟
•لا.. دخلت بمعدلي.
•هه.. طيب مع السلامة.
•مع السلامة.. فرصة سعيدة.
حصة مو بس أكرها.. ألا طايحة من عيني من زمان.. لأني عارفتها على حقيقتها..إنسانة تافهة من جوا..
لكني أخلاقي ما تسمح لي أنزل مستواي.. و ما أحب العيب يطلع مني..
سلام و كيف حال.. عادي أقدر عليها.. ما دام أني ما أتعامل معها على طول..

فتحت النوتة أشوف وش أسوي هالحين؟
>>أخلص أوراق الباص<<
و نفس الحكاية سألت بنات و رحت لبوابة الباصات عند مبني التربية الفنية، خذت منهم موافقة ولي الأمر، و بعدين قعدت ألف الجامعة
أشوف الي يتكلمون عنه...
رحت لكافتريا 12الي فيها المعجبات >>بويات<< شفت أشكالهم زي بنات الليل.. و المدمنات في الأفلام الأمريكية
((سلاسل و حلقات في الحواجب و الفم و غيره.. و تي شيرتات وسيعة.. و مكياج غريب.. و تسريحات غبية!))
و كلامهم كله صراخ و شتايم سوقية... و ما شفت شيء ثاني،،
يعني بس بنات عربجيات.. و مجانين.. و ما يعرفون يلبسون!
فقلت لنفسي" خل أروح أشوف شارع خمسة"
لقيت البنات متزامحين قدام الصراف يصرفون مكافأت الصيف.. و بنات عاديات أكثرهم ستايلهم قروى و بدوي.. جالسين ضحك و سوالف.. وبس
قلت في نفسي "حسبي الله عليك يا رجاء الصانع وجعتني رجولي ولا شفت إلي تقولين عليه!"
....................
(2)
دقت أمي علي:
•الو..السلام عليكم.
•الو..و عليكم السلام..هاه وش أخبار أول يوم في الجامعة؟
•أوف.. تعب و زحمة و حر!.. كيف حالكم؟
•بخير جعلك بخير..مير أبشرك خلصت أوراق أرض بنبان و بيبعونها.
•لاه! مبروك..الحمد لله أجل بتعطون أعمامك فلوسهم.
•أيه ..و أنا بعد ودي أخذ نصيبي من الأرض و البيت.. علشان أشتري بيت لي و لأخوانك ..هالإجار قص ظهري.. وما عندي غير تقاعد أبوهم..قلت لولدنا ياسر يدور لي على فلة صغيرة.. و بنحط لك و لخالد غرف علشان لو بغيتو تجيون عندي.
•يمه الله يرضى عليك أنتِ عارفة ما نقدر نخلي أمي هيلة بحالها.. و هي مريضة و مقعدة.. و خالتي هتون وجودها زي عدمه.. ألا عدمه أبرك! على الأقل تفك إذاها عنها
كل يوم تخانق مع رجلها ثمن تجي تنكد على أمي هيلة.
•أنا أبغى أعرف على أيش هو مستحملها؟ وحدة تاركة بيت رجلها ثلاث سنين عناد و حسد..وكل ما جاب لها بيت طلعت فيه عيب.. و تقعده في مجلس الرجال..الرجال أنحرم من بيت.. و عيشة أزواج بس عناد..
•ما علينا منها..فخار يكسر بعضه!
•هي مشكلتها أن ما حد وقف في وجهها..لا أهلي من أول..و لا خالي و لا حتى رجلها.
•ترى رجلها يبي يحافظ على بيته و بناته.. بعدين ترى أختك ذي.. حية من تحت تبن..تشبب الشر و تقعد ساكتة كأنها ما سوت شيء !شوفيها وش سوت في سالفة البيت.
........................
(3)
مرت الدراسة بسرعة..كنت كل يوم أتعلم شيء جديد..
شيء اجتماعي.. قبل ما يكون اكاديمي
تعرفت على بنات كثير في دفعتي.. و في الباص.. و حتى في الأنشطة الي صرت أشارك فيها، بس ما لقيت إلا بنت وحدة اسمها عهود عوضتني عن فراق سوزان و الجوهرة..
إلي صار تواصلنا قليل بسبب دراستنا.. و لأننا أصلاً ما كانت من عادتنا الكلام في التليفون كثير..
شريت ستايل الملك سعود المتعارف بين البنات ( من التخفيضات طبعاً) و الغير داخل في القوانين
جزم سبور..و نظارة شمسية..و شنطة كبيرة..و شريت بدال الشمسية.. قبعة عن الشمس.. في البداية كانوا البنات يضحكون عليّ.. بعدين صارت موضة في كل الجامعة..

و الأستاذة الي كلمتها يوم الجداول.. درسني مادة مبادئ البحث التربوي..
كان اسمها حنان و هي أستاذة قمة في كل شيء.. أخلاق و تعامل مع البنات، و شرح ممتع، و متمكنة من مادتها العلمية..
كانوا البنات كلهم منجينين عليها ..و خصوصاً بنت اسمها هنادي شخصيتها غريبة.. تتصرف تصرفات طفولية و حتى عقليتها عقل طفلة..
لدرجة أني استغربت كيف جابت معدل و دخلت الجامعة؟!
و نفس مشكلة حصة معي من أيام الثانوي صارت معها؟
بالعكس كانت حصة أهون شوي فهي كانت مهتمة بأستاذة الإنجليزي لأن كل البنات منجنين عليها،، لنفس أسباب إعجاب بنات الجامعة بأستاذة حنان ،،و بعد لأنها كانت أنيقة جداً ومهتمة بنفسها لكن هنادي تعلقها بأستاذة حنان غير..
تغار من البنات الي يشاركون..و أحس أنها تفكر فيها برغبة في التملك لها.. و وصل بها الموضوع لدرجة أنها اتصلت يوم على بنت خالتها علشان تسمعها صوت أستاذة حنان وهي تشرح!!
إما أستاذة حنان كانت تتعامل معها باحترام..و تصرف أخصائية نفسية محترفة..تتقبل بعض سلوكيات هنادي و ما تخليها تؤثر على المحاضرة..

إما بالنسبة للبيت فمثل العادة ..يومياً.. حروب أهلية.. و مذابح جماعية.. و الرغبة في التطهير العرقي(التخلص من عيال العليا) تزيد يوم عن يوم،،
خاصة بعد ما خذوا أعمام أمي ورثهم، و أمي قومت الدنيا و لا نزلتها على رأس خالها إبراهيم
حاول يصرفها لكنها كل يوم تدق عليه تقول "أبغى ورثي"
و لأن جدتي هيلة رافضة تبيع البيت شرت نصيب أمي في البيت..
و شرت أمي منيرة بكل ما تملك فلة صغيرة قريبة لبيوت عيال زوجها ياسر و حمد
و بدت الحياة تستقر.. الجامعة شاغله وقتي.. و مبعدتني عن قصر الغدر
و خالد يا في الجامعة يا في الشغل،،
و أمي منيرة تسلفت من عيال زوجها فلوس.. علشان تشتري الأثاث و حاجات أخواني..
و دبر لها واحد منهم سواق ليموزين بنقالي يعرفه (أمين..بس راعي قرقرة و كثرة كلام!)

حتى دق علي أخوي من أمي >هشام< الساعة ثلاث العصر و أنا في الجامعة أنتظر الدفعة الثانية من الباص
كلمني وهو يصيح: ألوو ريم..
هلا حبيبي.. وش فيك؟ طقك حسام؟
لا ماما طلعت من الصبح و لا جت إلى هالحين؟!
وش تقول؟! دقيت على جوالها؟
أيه دقيت بس مغلق.
دقيت على السواق أكبر خان؟
أيه بس بعد مغلق.
حبيبي لا تصيح هالحين بتجي،،يمكن راحت لحرمة و تأخرت عندها.
بس ماما كانت مسكرة باب الشارع.. و يوم جايينا من المدرسة.. و ما لقينا أحد يفتح لنا.. و أحنا هالحين في بيت أخوي ياسر.
قلت في نفسي:" يا ربي وش أسوي؟"
خلاص حبيبي بشوف خالد و أن شاء الله بتجي..تغديت؟
قالوا لي "كل".. بس أنا ما أبغى..أبغي ماما..
خلاص أن شاء الله جاية.. هالحين تغدى و حل واجباتك.. علشان لما تجي ماما ما تهاوشك.
طيب..بس أبي ماما.
طيب..طيب..خلاص حبيبي أن شاء الله ماما جاية.. مع السلامة.
مع السلامة.
اتصلت على خالد و ما رد.. فدقيت على أمي عسى و لعل
و دقيت على بيتها لكن لا حياة لمن تنادي
خفت
قلت يمكن أمي صار لها حادث؟
و لا هالسواق الشايب سوى لها شي؟
و لا أنسرق جوالها؟
كل شيء توقعته إلا إلي صار؟!

اكمـــــــل
*( متااااااابعهـ )*